Për shkak të rritjes së ndjeshme të rasteve me koronavirus në Shqipëri, ish-ministri i Shëndetësisë, Tritan Shehu apeloi për ndërhyrje urgjente tek sistemi spitalor. Ai tha në “Facebook” se duhen marrë menjëherë masa për të shpëtuar institucionet shëndetësore sepse qeveria nuk është e qartë për të menduar.
“Të shpëtohen institucionet shëndetësore, kështu shpëtojmë edhe qytetarët! Ndërsa qeveria e mbërthyer në amulli e ide të rrezikshme bllokon transportin publik, pa qenë e aftë të lexojë as dy karakteristikat që përsistojne nga ato pak të dhëna zyrtare:
—Gjenerim infeksioni nga institucionet kryesore shëndetësore në krizë.
—Rritja e rasteve e vatrave të reja në vend, të lidhura dukshëm me ato.
Kjo gjendje imponon ndërhyrje urgjente tek sistemi spitalor e parësor e me ata bashkë në të gjithë territorin e vendit.”
Tritan Shehu kërkoi që të kryhet sa më parë testimi virusal dhe imunologjik i personelit shëndetësor, testimi i të gjithë pacientëve të shtruar, çdo qytetar që e ka temperaturën më të lartë se 37.5 si edhe të shpërndahen mjete mbrojtëse për stafet spitalore. Këtë të premte në Shqipëri u shënua shifra më rekord e të infektuarve që prej nisjes së epidemisë, 48 raste të reja.
