Ky është helikopteri “EC 145” pak minuta përpara se te ngrihej ne fluturimin e fundit qe u mori jetën dy ushtarakeve dhe la te plagosur nje tjetër. Mjeti fluturues u rrezua rreth orës 14:00 ne Malësinë e Madhe pranë fshatit Grizhe dhe përfundoi ne ujërat e liqenit. Per pasoje, humbi jetën kapiten Florian Deliaj piloti i helikopterit, si dhe togeri Donald Hoxha me detyrën e ndihmësit. Ndërkohë u plagos ushtari profesionist Gerald Baramuça. Ky i fundit është transportuar ne spitalin e Shkodrës dhe besohet se e ka kaluar fazën e rrezikut per jeten. Pasi ka marre mjekimin e nevojshëm Baramuça është dërguar ne Spitalin e Traumës ne Tirane. Forcat e shumta te ushtrisë e policisë qe mbërritën ne vendin e ngjarjes, arritën te nxirrnin nga uji trupat e pajete te dy viktimave. Te paret qe sinjalizuan sallën operative te policisë ishin peshkatarët, te cilët i dhanë edhe ndihmën e pare te plagosurit. Ata kane rrëfyer per Vizion Plus përpjekjet per transportimin e Gerald Baramuçes, drejt spitalit rajonal te Shkodrës. Banoret kishin pare fillimisht helikopterin “EC145” te fluturonte mjaft ulet mbi çatitë e shtëpive. Pas kontaktit me sipërfaqen e ujit ne liqen është dëgjuar një shpërthim, ndërsa janë pare flake e tym. Shkaqet e këtij aksidenti te rende, nuk dihet ende, por dyshimet e para flasin per një defekt ne sistemin e drejtimit. Helikopteri ishte ne një fluturim rutine stërvitjeje. Kontakti i fundit i piloteve me kullën e kontrollit te Rinasit, ka qene ne orën 13 e 45 minuta. Ata nuk kane raportuar për probleme ne mjet.
Rrëzohet helikopteri në Malësinë e Madhe, 2 viktima
