Seanca për mocionin e mosbesimit kundër qeverisë në Maqedonine e Veriut është ndërprerë pas kërkesës e forces më të madhe opozitare, VMRO-DPMNE.
Ashtu siç ishte paralajmëruar kuvendi nisi procesin paraditen e kësaj të enjteje, por lideri i opozitës, Hristijan Mickoski kërkoi ndërprerjen për të shqyrtuar situatën pasi nuk plotësohej numri i duhur i deputeteve për rrezimin e Zoran Zaev.
Ai që prishi planin e opozitës është Deputeti i Lëvizjes Besa, Kastriot Rexhepi. Përmes një postimi në rrrjetet sociale, ai sqaroi se nuk është moment i duhur për të ndryshuar qeverinë.
KASTRIOT REXHEPI
DEPUTET I LËVIZJES “BESA”
“Duke pasur parasysh momentin politik, pas shtyrjes të dorëheqjes nga kryeministri Zoran Zaev, për hir të procesit dhe sinjalet e forta nga partnerët strategjik, SHBA dhe shtetet e BE, që më janë komunikuar nga përfaqësues të lartë diplomatik, se në muajin dhjetor vendi ka gjasa të mëdha të marrë datën për fillimin e bisedimeve për anëtarësim në BE, vendosa që mos të marr pjesë në seancën parlamentare ku duhej të merrej vendim, me të cilin do të vihet në pikëpyetje ky pikësynim jetik kombëtar dhe shtetëror.”
Mocioni e mosbesimit është dorëzuar nga VMRO-DPMNE disa ditë më parë.
Nënshkrues të kësaj nisme janë Aleanca për Shqiptarët dhe Alternativa që ka 12deputete , partia maqedonase “E Majta” me dy dhe Lëvizja Besa e cila ka tre deputetë.
Votëbesimi ndaj qeverisë duhet të përfundojë në të njëjtën ditë.
Nëse opozita siguron 61 vota kundër kryeministrit Zaev , atëherë qeveria është e detyruar të japë dorëheqje brenda 24 orëve.
