Ronaldihno drejt rikthimit në futboll pas 11 vitesh
Një rikthim i bujshëm mund të bëhet realitet në futbollin italian. Ronaldinho, një nga emrat më të mëdhenj të historisë së futbollit, raportohet se është pranë debutimit me Ravenna-n, skuadrën që garon në Serinë C.
Sipas mediave italiane, ish-ylli i Barcelonës dhe Milanit mund të zbresë në fushë më 15 nëntor, në përballjen kundër Forli-t, e planifikuar të luhet në orën 17:30 në stadiumin “Bruno Benelli”.
Braziliani 46-vjeçar është bërë pjesë e projektit të Ravenna-s gjatë verës dhe është regjistruar si futbollist i klubit. Objektivi i tij është të luajë të paktën një ndeshje zyrtare, ndërsa synon edhe të arrijë kuotën e 300 golave në karrierë.
Megjithatë, gjithçka mbetet në pritje të konfirmimit zyrtar. Ronaldinho po ndjek një program individual stërvitor dhe vendimi për aktivizimin e tij do të varet nga gjendja fizike.
Ish-fituesi i Topit të Artë e mbylli karrierën profesioniste në vitin 2015, pas aventurës me Fluminense-n. Gjatë viteve të tij më të mira, ai magjepsi tifozët me fanellat e Barcelonës, Milanit dhe Paris Saint-Germain.
Nëse debutimi realizohet, rikthimi i Ronaldinhos do të ishte një ngjarje e veçantë për tifozët, të cilët do të kishin mundësinë të shihnin sërish në fushë një prej futbollistëve më spektakolarë të brezit të tij.
