Pedagogu Rezart Prifti po planifikon që në zgjedhjet e 2021 të dalë përballë PS, PD, LSI dhe çdo partie tjetër që do të marrë pjesë në garë.

Deklaratën ai e bëri gjatë një interviste në emisionin “7 pa 5” të gazetares Pranvera Borakaj. Prifti tha se po ngjiz një strukturë të re politike dhe se mbështetja për të është e madhe.

“Unë uroj që vitin tjetër që janë zgjedhjet unë të jem alternativë. Sepse nuk mban më. Jam duke u përgatitur për të marrë përsipër të gjitha kostot. Sepse është vizion që unë ose do të marr çantën e do iki andej nga kam ardhur, do të bëj tentativën e fundit. Kam shumë njerëz që më mbështesin, publikisht dhe në mënyrë private. Po e ngjizim. U bë kohë që po e mendoj. Reforma zgjedhore është shumë e rëndësishme sepse voton Miri, numëron Loni. Bëjeni si të doni sistemin, por mjafton që ajo votë të numërohet. Këtu duhet të thuhen ca të vërteta të mëdha, këtu nuk mban më.”

Gjithë debatin për Teatrin Kombëtar, profesori e cilësoi një lojë të madhe politike. Sipas tij, njerëzit po qajnë për gjëra anormale, ndërsa për ato normalet që ndodhin çdo ditë nuk kujtohet  njeri.  

“Kjo është një lojë e madhe politike, nga protesta e studenëve mësova shumë gjëra, sesi të vihen shkopinjtë nën rrota. Nuk ka asgjë anormale për mua këtu. E vetmja gjë anormale ishte dhuna e policisë. A do të prishej teatri? Do të prishej. Ke një kastë drejtuese që të prish natën dhe të qan ditën. Ke një kastë politike që bën karagjozlliqe. Është një lojë e madhe politike. Duhet shmangur gjithë kjo. Të gjitha këto janë pjesë e një loje të mëdha. Pse nuk foli njeri kur një javë më parë në Tiranë u prishën katër vila shekullore? Po qajnë për gjënë e gabuar, se u prish ndërtesa. Ata u dhunuan. Para ca ditësh u dhunua 15-vjeçari. Qau njeri për atë? A qan njeri pse janë lënë në çadër njerëzit e dëmtuar nga tërmeti? Është një fushatë elektorale. Këta njerëz qajnë për gjëra anormale dhe jo për gjërat normale.”

Sa i takon qëndrimit të opozitës në mbrojtje të Teatrit Kombëtar, Rezart Prifti tha me ironi se trupat e opozitarëve kanë dalë shumë të fortë. Kjo pasi jo pak herë kanë deklaruar se godina do të shembet vetëm nëse kalohet mbi trupat e tyre.  

Leave a Reply

Your email address will not be published. Required fields are marked *