Policia ka shoqëruar në komisariat disa protestues të Astirit mes të cilëve dhe ish-deputetin e PD, Klevis Balliu pas përplasjes në Unazën e Re.
Pas këtij veprimi ish-deputetë të PD e LSI së bashku me protestues të Astirit kanë shkuar në Komisariatin Nr.6 duke kërkuar lirimin e tyre.
Sekretari i Përgjithshëm I PD, Gazment Bardhi deklaroi për mediat se shoqërimet janë një turp. Më tej, Bardhi theksoi se opozita e bashkuar nuk e njeh institucionin e drejtorit të Policisë pasi është I përbërë nga kriminelë.
“Një sjellje kriminale e drejtorit të policisë Tiranë, i cili me urdhër politik të Ramës tenton të intimidojë qytetarët në shkelje të ligjit. Janë duke fabrikuar fakte duke mbajtur 4 qytetarë të pafajshëm, mes tyre edhe ish deputetin Klevis Balliu. I bëj thirrje ministrit të Brendshëm mos provoko popullin shqiptar. Nga ky moment ne nuk e njohim institucionin e drejtorit të Policisë së Tiranës. Është një kriminel që i ka shpallur luftë qytetarëve. Luftën do ta marrë prapësht Nga ky moment opozita nuk njeh institucionin e drejtorit të Policisë së Tiranës, do të marrë përgjigjen e merituar.”, tha Bardhi.
Ndërkohë nga ana tjetër, nënkryetari i PD, Edi Paloka deklaroi se dolën në rrugë nga frika se mos u prisheshin shtëpitë.
“Protestuesit e Unazës së re kanë dalë në rrugë dhe kanë menduar në një moment se siç ka bërë te bregu i lumit me prishjen e shtëpive, janë ngritur dhe kanë dalë në rrugë për të mbrojtur shtëpitë e tyre. Rama vijon të ngulë këmbë dhe të marrë milionat e korrupsionit dhe nuk ndalet as ndaj dhunës së banorëve.”, u shpreh Paloka.
Paloka lëshoi një paralajmërim edhe kryeministrin Rama.
“Rama të jetë i bindur se sa më shumë të shtojë dhunën, aq më e madhe do të jetë revolta e qytetarëve.”, tha ai.
