Autoritetet portugeze kanë kapur një ngarkesë rekord kokaine prej 5.2 ton në një jaht spanjoll në Oqeanin Atlantik, ndërsa në pranga përfunduan dy shtetas spanjollë dhe një peruan.
Autoritetet dyshojnë se lënda narkotike i përkiste një bande ndërkombëtare të trafikut të drogës që po sillte kokainë në Evropë përmes Gadishullit Iberik.
LUIS NEVES
SHEF I POLICISE ANTIDROGE, PORTUGALI
“Arritëm të sekuestrojmë një sasi rekord kokaine e cila u gjend brenda një jahti. Kjo është një fitore e madhe në nivel botëror dhe tregon se po punojmë me një rrjet të rrezikshëm kriminal. Kjo është sasia më e madhe e kokainës që është kapur në nivel kombëtar në këto 15 vite.”
E organizuar në 183 pako, kokaina e sekuestruar sipas policisë, nëse do të shitej në treg, do të kapte vlerën e rreth 200 milionë eurove.
Në Operacionin policor ndërkombëtar bashkëpunuan edhe Spanja, SHBA si dhe Mbretëria e Bashkuar.
