Kreu i Prokurorisë së Posaçme (SPAK), Altin Dumani, gjatë raportimit vjetor përpara Këshillit të Lartë të Prokurorisë, ka ngritur shqetësimin për mungesën totale të kallëzimeve nga institucionet kyçe si Doganat dhe Tatimet.
Dumani prezantoi punën e SPAK për vitin 2024, raport i cili është dorëzuar edhe në Kuvend. Në seancën dëgjimore ishin të pranishëm edhe përfaqësues të ambasadës amerikane dhe një prokuror i OPDAT.
“Logjika thotë se kushdo që ka dijeni për veprime korruptive, duhet t’i kallëzojë ato. Nuk mund të thuhet se korrupsioni ka rënë, thjesht sepse nuk ka kallëzime. Më shqetëson fakti që institucione të rëndësishme si Doganat dhe Tatimet nuk kanë depozituar asnjë kallëzim pranë SPAK. Nuk më duket aspak e besueshme që aty korrupsioni të jetë zero,” u shpreh Dumani.
Ai shtoi se numri i kallëzimeve nga qytetarët nuk është indikator i mjaftueshëm për të vlerësuar nëse kriminaliteti apo korrupsioni kanë rënë, duke theksuar rëndësinë e angazhimit institucional në luftën kundër korrupsionit.
/vizionplus.tv
