Kryeministri Edi Rama ka shpërndarë një video-mesazh të futbollistit Lorik Cana lidhur me koronavirusin. Cana, i cili ndodhet i vetëizoluar në shtëpinë në Itali, bën thirrje që të gjithë njerëzit të kenë kujdes për higjienën.
“Përshëndetje nga shtëpia ime në Romë. Disa gjëra të vogla për secilin prej nesh. Kemi detyrë të respektojnë sidomos pjesën e higjienës, të lajmë duart, të evitojmë grumbullimet, në gjendje gripale të qëndrojmë në shtëpi. Studentët që janë pushim, nuk janë pushim por kanë një mision përgjegjësie.”
Ndërsa kryeministri Edi Rama bëri thirrje që të kihet kujdes nga lajmet e rreme dhe që përhapin panik.
“? FRIKË JO, KUJDES PO!
? DHE JU LUTEM:
Të ruajmë veten dhe njëri-tjetrin duke kufizuar sa më shumë kontaktet fizike! Të lajmë duart sa më shpesh për jo më pak se 20 sekonda! Të kufizojmë daljet dhe uljet nëpër kafene e restorante, vajtjet në palestra, disko e në mjedise të mbyllura me kontakte të shumta! Të mbrohemi me maskën e arsyes nga INFODEMIA – lajmet, kronikat, komentet, debatet që krijojnë konfuzion, pasiguri, shkurajim!”
