Kryeministri Edi Rama njoftoi sot një reformë në menaxhimin e hapësirave të plazheve. Kreu i qeverisë paralajmëroi se verën e ardhshme lejen për të mbajtur shezllone përpara pronave do ta kenë vetëm hotelet e jo më lokalet apo restorantet.
“Përveçse se ata kanë hotele nuk mund të jepen më leje plazhesh për të ardhur një individ, një person juridik apo fizik, për të thënë dua këtë plazhin këtu do të vë beach bar e do të vë shezllone. Mund të vësh beach bar por nuk ke shezllone. Mund të kesh restorant por nuk ke shezllone. Plazhi duhet shijuar në mënyrën më të mirë të mundshme. Dhe shijimi i plazhit mes atyre krevateve të ngjitur me njëri tjetrin është e pamundur.”, tha Rama.
Rama njoftoi edhe kontrollin për kapacitetin e shezlloneve si dhe lirimin e me shume hapësirave publike në plazh. Hotelet do të lejohen do të vendosin shezllonët në raport me numrin e dhomave që kanë.
“Nuk mund të kesh një hotel me 40 dhoma dhe të vësh 200 shezllone e të marrësh popull aty e t’i detyrosh të paguajnë. Do të vësh shezllone për aq sa ke kapacitet! Natyrisht jo një për dhomë, dhe do të lësh distancë nga shezlloni në shezllon. Nuk mund t’i çosh shezllonet deri në breg, që njerëzit kur duan të kalojnë në breg ta kenë të pamundur ose të bien me not ose të dalin nga rruga e të mallkojnë veten që erdhën në plazh”, u shpreh Rama.
Gjithashtu sipas kryeministrit veç plazhit publik një pjesë e hapësirave do të menaxhohen nga bashkitë, kundrejt një çmimi tavan të detyruar.
“Do ta fillojmë me bashkitë, që bashkitë të marrin hapësira e të vendosin bashkitë çadra. Aty ku është e arsyeshme e shezlloneve, por me çmim tavan të detyruar. E kemi filluar prej disa vitesh, këtë vit e shtymë më përpara që bashkitë ta administrojnë. Lezha është model se është polic ai kryetari i bashkisë së Lezhës . Të gjitha nivelet e popullsive duhet të kenë korsinë e tyre por nuk mund të shkohet në ekstrem, as në njërën as në tjetrën. Nuk mund ti mbyllim derën e turistëve me çantë në krah por duhet të kombinojmë shumë gjëra”, tha Rama
Shifrat e turistëve për kryeministrin gjatë këtij viti kanë qenë të kënaqshme, ndërsa bëri thirrje që të ketë një vëmendje të shtuar në cilësinë e shërbimit./vizionplus.tv
