Rama nxjerr foto nga Kombinati: Tregu është kthyer në një model të shkëlqyer vetëdijeje

Kryeministri Edi Rama ka publikuar pamje nga tregu i Kombinatit, i cili ditë më parë shfaqte mungesa e probleme në respektimin e masave dhe distancimin social.

Rama shkruan se fluksi i qytetarëve nuk lidhet me fashën orare, por me zbatimin e rregullave. Ai shtoi që tregu i Kombinatit është kthyer në një model të shkëlqyer vetëdijeje qytetare për përgjegjësinë e secilit në këto ditë pandemie.

“Ja që s’është punë fashe orare, po thjesht çështje durimi e rregulli. Tregu i Kombinatit sot është kthyer nga sheshi për përsheshin e armikut që ishte të shtunën e shkuar, në një model të shkëlqyer vetëdijeje qytetare për përgjegjësinë e secilit në këtë luftë”, shkruan Rama.