Kryeministri Edi Rama ka zhvilluar këtë të martë një takim me Presidentin e Këshillit Europian, Antonio Costa, në kuadër të turit ballkanik që ky i fundit po zhvillon.
Pas takimit kokë më kokë në Kryeministri, Rama dhe presidenti i Këshillit të Europës kanë mbëjtur një konferencë për shtyp.
Rama, teksa shprehu mirënjohje dhe falenderim për mbështetjen e pakufijshme të Antonio Costas, theksoi se mes tyre ka 100% dakordësi në të gjitha çështjet.
Rama tha se Shqipëria ka ende detyra për të përmbushur, në një proces që ka shumë sfida, deri në anëtarësimin e plotë të Shqipërisë në BE.
Edi Rama:
Më duhet ti uroj mirëseardhjen për herë të 5-të një miku të çmuar të Shqipërisë por edhe të Ballkanit Perëndimor. Mbështetës i palodhur që prej fillimit dhe sot në cilësinë e presidentit të këshillit europian.
Është gjithmonë kënaqësi, jo për protokoll e as për mikëpritjen e pakushte por për faktin se çdo takim me presidentin është një orë mësimi dhe mësimi nga një eksperiencë e madhe dhe patjetër edhe nga një njohje e thellë e çështjeve të europës e botës, ekonomisë, sociale e kështu me radhë. Dua ta falenderoj për mbështetjen e palodhur edhe përpara sesa ne të realizonin mbylljen e fazës së çeljes së kapitujve dhe hapjen e fazës së mbylljes, në një kohë kur të gjithë po përballemi me sfida të përbashkëta.
Ne ndajmë plotësisht me presidentin bindjen se pjesa kryesore e punës tonë mbetet puna jonë. Ne kemi detyra për të përmbushur, jo për hir të Brukselit, Berlinit apo Parisit.
Në këtë fazë, theksi kryesor është zbatimi i atyre reformave që janë kryer me sukses apo ligjeve që do vazhdojnë të hyjnë nga trupi ligjor i BE. Është një proces me shumë sfida. Presidenti na ka sugjeruar që të rrisim përpjekjet për të njohur publikun e gjerë me të gjitha sfidat në çdo hap që ne hedhim përpara. E kemi pyetur për eksperiencën para dhe pas anëtarësimit ëpr sfidat e fermerëve etj.
Ajo që e bën të vështirë të zgjatem është se ne kemi dakordësi 100% në të gjitha çështjet, detyrat që ne duhet të bëjmë, të ecim me këtë rritëm dhe të vazhdojmë me mbylljen e kapitujve dhe rajoni të funksionojë si një kolektiv bashkëpunues.
