Kryeministri Edi Rama deklaroi këtë të enjte se janë 1.500 infermierë që janë në pritje për të nisur punë në Shqipëri. Duke përgënjeshtruar lajmet se mjekët po largohen çdo ditë e më shumë, Rama tha se e vetmja gjë që ata duhet të bëjnë për t’u punësuar është regjistrimi në portal.
“Sot që flasim janë 1500 infermierë në listë pritje, jo pas dyerve të partive, jo pas xhaketës së deputetit, jo në kërkim të krushkut apo të kushritrir që mund t’i ndohmojë të futen në punë, por në listë pritje në portalin infermierë për shqipërinë. Ne nuk e kemi këtë problem. Lëvizja e mjekëve është trend. Për ne e rëndësishme është që shqiptarët të marrin shërbim dhe të mos u mungojë as mjeku, as infermieri. Sot janë 113 mjekë të huaj që punojnë në shëndetësi në Republikën e Shqipërisë. Është domosdoshmëri që të bëjmë gjithçka që të ruajmë dhe të forcojmë integritetin e figurës së mjekut që ka pësuar goditje shumë të mëdha dhe është bërë objekt i dhunës. Ne kemi ashpërsuar dënimin penal për çdo person që ndërmerr veprime agresive ndaj profesionistëve të shëndetit.”
Rama shtoi se për mjekët që punojnë larg vendbanimit të tyre do të ketë edhe stimulime financiare.
“Ata që dalin sot nga universiteti dhe duan të ushtrojnë profesionin e mjekut në Shqipëri dhe ata kolegë të tyret që punojnë në Shqipëri dhe që do të pranojnë të punojnë larg vendbanimit të tyre, përveç pagës, kanë edhe një shpërblim mujor. Po përgatisim edhe disa masa të tjera mbështetëse prë të rritur mbrojtjen dhe për të dëshmuar respektin ndaj figurës së mjekut në Shqipëri, nga pikëpamja e trajtimit financiar dhe të trajtimit të tyre me banesë.”
Deklaratat kryeministri i bëri gjatë ceremonisë së diplomimit të mjekëve të rinj.
