Kryeministri Edi Rama ka paralelizuar qëndrimin e Shoqatës së Gjyqtarëve lidhur me çështjen e rritjes së pagave me atë të një partie politike.
Sipas Ramës, kërkesat e tyre nuk janë të drejta, ndërsa po kërkojnë të ndërhyjnë në politikën e pagave.
“Befas, shoqata e gjyqtarëve shfaqet publikisht si një parti politike, me një gjuhë të papranueshme dhe të pajustifikueshme për të ata të cilët përfaqësojnë pushtetin gjyqësor, pra përfaqësojnë një pushtet, i cili arbitron dhe jo një arbitër, i cili thotë ‘’bilbili është i imi, topi është i imi, penalltinë do ta gjuaj vetë dhe porta duhet të rrijë pa portier”, tha Rama.
Shefi i ekzekutivit nuk e kurseu ironinë, duke i sugjeruar gjyqtarëve që të regjistrohen si forcë politike.
“E gjithë kjo tymnajë populiste…”, po kush jeni ju që i jepni vetes të drejtën të bëni përcaktime të tilla; tymnajë populiste?! Jeni parti politike? Regjistrohuni si parti politike, dilni në garë dhe mbroni platformën tuaj dhe pastaj bëni dhe ju siç bëjnë plot ‘’luftën’’ me etiketime, me sharje, me fyerje, me vendosje të kundërshtarit në pozita që nuk janë absolutisht të lidhura me argumentin, por me etiketimin”, tha kreu i qeverisë.
Rikujtoi se rritja e pagave të gjyqtarëve, sipas kërkesës së tyre do t’i kushtonte 37 milionë euro buxhetit të shtetit.
“Ju kërkoni që për gjyqtarin e Apelit paga të shkojë nga 3480 që është sot aktualisht, 3480 euro, në 5500 euro. Ju kërkoni që paga në Gjykatën e Lartë të shkojë 5800 euro dhe ju kërkoni që pagat e prokurorëve të SPAK-ut të cilët, edhe një herë tjetër për SPAK-un, e veçoj sepse nuk i është bashkuar dhe respekte, nuk i është bashkuar kësaj përpjekjeje absurde, nuk ka firmosur për të qenë palë në Gjykatën Kushtetuese për ta çuar pagën e vet 9800 euro”, tha Rama.
Rama nënvizoi se Shoqata e Unionit të Gjyqtarëve është e pezulluar nga Qendra Kombëtare e Biznesit sepse nuk kanë paguar detyrimet tatimore dhe kontributet shoqërore.
