Kryeministri Rama mblodhi sot në qytetin e Vlorës ministrat e kabinetit të tij, në një takim informal që ka në fokus punën e bërë gjatë 300 ditëve të para të mandatit të dytë qeverisës.
Diskutimet që po zhvillohen në ambientet e vilave qeveritare larg vëmendjes së mediave, nisën në orën 10. 00.
Burime nga takimi bëjnë të ditur se kryeministri Rama ka dëgjuar bilancin e bërë nga të gjithë ministrat që kanë pothuajse një vit në detyrë në këtë mandate të dytë.
Të dhënat janë prezantuar duke qenë të krahasuara me objektivat e vendosura që me shpalljen e programit qeverisës në shtator 2017. Po ashtu do të bëhet dhe një analizë e çështjeve të prezantuara në Portalin e Bashkëqeverisjes dhe zgjidhjes së problemeve të qytetarëve.
Nuk dihet ende ecuria e analizës për punën e ministrave, por ato do t’i paraprijnë mbledhjes së Asamblesë së Partisë Socialiste në vjeshtë. Aty mund të prezantohen edhe ndryshimet e mundshme në kabinetin qeveritar.
Kryeministri Rama ka premtuar ndërkohë një vit të mbushur me punë e përpjekje maksimale, në funksion të marrjes hapjes së negociatave të anëtarësimit me Bashkimin Europian qershorin e vitit tjetër.
Po ashtu, qeverisja pritet të jetë e angazhuar maksimalisht edhe në funksion të përgatitjes për zgjedhjet lokale qe janë pas 10 muajsh.
