ISHP dhe Task Forca anti-COVID, AKU dhe institucione të tjera të mbështetura nga policia kanë ushtruar gjatë dy javëve të fundit kontrrolle në çdo subjekt tregtar dhe market,në qytet e fshat të Beratit.
Nga inspektimet e kryera,që kanë variuar deri në 90 subjekte në ditë,është vërejtur se ata që nuk respektojnë asnjë masë sigurie janë vetë qytetarët.
Të kapur pa maska dhe pa ruajtur distancën nga njëri-tjetri në disa markete në qytetin e Beratit, Inspektoriati Shtetëror Shëndetësor ka gjobitur 6 qytetarë që kanë shkelur protokollet e sigurisë të miratuara nga Ministria e Shëndetësisë për mbrojtjen nga COVID-19.
Ndaj tyre është vendosur masa administrative me gjobë prej 20 mije lekë (të vjetra),ndërkohë që aksioni vijon edhe në farmacitë,klinikat dentare,institucionet publike etj. Burimet zyrtare nga Inspektoriati Shtetëror Shëndetësor në Berat,bëjnë me dije se,po vijojnë punën në terren për ndërgjegjësimin e subjekteve për zbatimin e protokolleve të sigurisë,me qëllim parandalimin e përhapjes së koronavirusit dhe ruajtjen e shëndetit të qytetarëve.
Të njëjtat burime konfirmojnë se,prej dy ditësh janë intensifikuar kontrrollet edhe në institucionet arsimore (kopshte,çerdhe e shkolla),të cilat duhet të plotësojnë çdo kriter të vendosur nga Ministria e Shëndetësisë,që nga dezindektimi i çdo ambjenti,higjena,përdorimi i maskave,ruajtja e distancën në klasa etj,me qëllim që të jenë funksionalë për rifillimin e vitit të ri shkollor.
