Gjykata e Selanikut ka dënuar me burg dy ish-nënkryetarë të Bashkisë Pylaia–Chortiatis, duke i shpallur fajtorë për neglizhencë dhe mosveprim lidhur me sulmet nga qentë endacakë që çuan në vdekjen e një 65-vjeçari dhe plagosjen e rëndë të një 82-vjeçari.
Ngjarjet ndodhën në mars të vitit 2020, në zonën Elaeorema, brenda pak orësh nga njëra-tjetra. Sipas vendimit të gjykatës, dy ish-zyrtarët, të ngarkuar në atë kohë me menaxhimin e çështjeve mjedisore dhe kontrollin e qenve endacakë, nuk ndërmorën masat e nevojshme për të parandaluar rrezikun, pavarësisht sinjalizimeve të mëparshme.
Gjykata u dha secilit prej tyre një dënim total prej 3 vitesh e 9 muajsh burg, duke njohur një rrethanë lehtësuese për shërbimin e mëparshëm. Të dy kanë ankimuar vendimin dhe janë lënë të lirë deri në shqyrtimin e apelimit.
Sipas dosjes gjyqësore, 65-vjeçari u sulmua i pari dhe ndërroi jetë pas disa ditësh në spital, ndërsa 82-vjeçari u plagos rëndë dhe u shtrua për trajtim mjekësor. Katër orë më herët, në të njëjtën zonë, ishte raportuar edhe një tjetër sulm ndaj një gruaje të re, rast që ishte denoncuar në polici.
Gjatë seancës, familjarët e viktimës deklaruan se 65-vjeçari kishte dalë herët në mëngjes për vrap, ndërsa viktima e dytë përshkroi para gjykatës momentet e sulmit. Nga ana tjetër, dy ish-nënkryetarët mohuan përgjegjësinë penale, duke ia atribuar fajin njëri-tjetrit.
Në përfundim, prokuroria theksoi se është e papranueshme që në një qytet të zhvilluar të ndodhin ngjarje të tilla për shkak të mungesës së masave parandaluese dhe kontrollit institucional.
