Qëlloi me armë zjarri, dhunoi të atin dhe kërcënoi policët/ Arrestohet 42-vjeçari
Policia e Tiranës ka arrestuar një 42-vjeçar, pasi ka dhunuar babanë dhe ka qëlluar me armë zjarri në banesë.
Në pranga përfundoi shtetasi me iniciale Sh.L., i cili ka kanosur edhe punonjësit e policisë, teksa tentonte të largohej.
Shërbimet e policisë u njoftuan se ne fshatin Bulticë, në banesën e babait të agresorit, 64-vjeçarit me iniciale Sh. L. kishte të shtëna me armë. Në momentin që shërbimet e Policisë janë afruar për të hyrë në banesë, 42-vjeçari ka kërcënuar me jetë efektivët për të mos u afruar në banesë, pasi do t’i qëllonte me armë zjarri.
Uniformat blu i kanë bërë thirrje autorit që të dorëzohej dhe të hidhte armën, por ai ka dalë nga banesa duke përfituar nga errësira. Pas disa orë ndjekjeje dhe kontrollesh është bërë e mundur kapjen e tij në një banesë të braktisur dhe është sekuestruar arma e zjarrit.
