Presidenti rus Vladimir Putin dhe presidenti turk Rexhep Tajip Erdogan ditën e sotme kanë zhvilluar një bisedë telefonike, raporton agjencia ruse e lajmeve TASS.
Dy liderët diskutuan mënyrat për të përmirësuar efikasitetin e bashkëpunimit tregtar dhe ekonomik dypalësh, tha Kremlini në një deklaratë.
“Në vijim të bisedës në Kazan më 23 tetor, ata diskutuan në mënyrë thelbësore çështjet urgjente të agjendës dypalëshe me fokus në përmirësimin e efektivitetit të bashkëpunimit tregtar dhe ekonomik. Në lidhje me këtë, agjencitë përkatëse do të angazhohen në komunikim,” thuhet në deklaratë.
Udhëheqësit diskutuan gjithashtu disa çështje ndërkombëtare.
Putin dhe Erdogan u takuan në margjinat e Samitit të BRICS në Kazan, Rusi më 23 tetor.
Në atë kohë, ata diskutuan perspektivat për zhvillimin e lidhjeve tregtare dhe ekonomike, si dhe një projekt për të krijuar një qendër ndërkombëtare të gazit në Turqi./vizionplus.tv
