Presidenti rus Vladimir Putin ka deklaruar se Rusia është e gatshme të luajë një rol aktiv në ndërmjetësimin e bisedimeve të paqes mes Shteteve të Bashkuara dhe Iranit, pas dështimit të fundit të negociatave në Islamabad.
Deklarata erdhi gjatë një bisede telefonike mes Vladimir Putin dhe presidentit iranian Masoud Pezeshkian, në një moment të tensionuar për rajonin.
Sipas mediave ndërkombëtare, Putin theksoi se Moska mbetet e përkushtuar për të kontribuar në gjetjen e një zgjidhjeje paqësore për situatën në Lindjen e Mesme.
Kremlini bëri të ditur se presidenti rus ka shprehur gatishmërinë për të vazhduar mbështetjen e iniciativave diplomatike, me synimin për të arritur një paqe të drejtë dhe të qëndrueshme në rajon.
“Putin theksoi se është i gatshëm të vazhdojë të lehtësojë kërkimin për një zgjidhje politike dhe diplomatike të konfliktit dhe të veprojë si ndërmjetës në përpjekjet për të arritur një paqe të drejtë dhe të qëndrueshme në Lindjen e Mesme,” thuhet në deklaratën zyrtare të Kremlinit.
