Një prej punonjësve të kompanisë “Bankers Petroleum” ka humbur ndjenjat këtë të hënë në ambientet e jashtme të Sindikatës së Sektorit të Hidrokarbureve në Marinzë, ku po zhvillohet greva me bojkot pune.
Punonjësi, Josif Lino, me pozicion mekanik, është transportuar menjëherë drejt qendrës shëndetësore të kompanisë, ku i është dhënë ndihma e nevojshme mjekësore.
Ngjarja ka ndodhur në ditën e gjashtë të grevës së urisë, ku prej ditësh 10 anëtarë të këshillit sindikal kanë shfaqur përkeqësim të gjendjes shëndetësore.
Ndërkohë, tensioni dhe pritja e një zgjidhjeje konkrete po ndikon edhe tek punonjësit e tjerë të fushës naftëmbajtëse, të cilët kanë bojkotuar punën dhe po vijojnë solidarizimin pa ndërprerje jashtë ambienteve të sindikatës.
