Vitet e fundit shifrat tregojnë për një ekonomi të përmirësuar, më me shumë turistë, më shumë investime të huaja, me rritje remitancash, rritje pagash, por “Shoqata e barëve dhe restoranteve” flet për një rënie të konsumit.
Enri Jahaj nga “Shoqata e bareve dhe restoranteve” në një intervistë për emisionin e-ZONE thotë se piku i sezonit turistik nuk shfaq një rritje të konsumit në këto segmente biznesesh.
“Arsyeja e parë lidhet me turistin “low-cost”. Në vendin tonë turistët nuk shpenzojnë ose janë në limitet minimale të shpenzimeve. Arsyeja e dytë lidhet me ndryshimet, që po pëson tregu. Shumë hotele po ofrojnë shërbimin “all-inclusive” çka e bëjnë turistin të mos shpenzojë jashtë hotelit. Një tjetër arsye është se shtresa e mesme në Shqipëri duket se është varfëruar përballë çmimeve, qirave që janë shtrenjtuar ndjeshëm. Ka dhe një arsye, që në këtë treg janë shumë subjekte që ofrojnë të njëjtin shërbim, pa patur asnjë diferencim nga konkurrenca”, tha Jahaj.
Por paralelisht me këtë situatë, sipas Enri Jahaj bizneset e kësaj fushe janë në ngërç për likuiditet. Kleringu si një fenomen, që nisi të dominojë në ndërtim, duket se është shtrirë në të gjitha bizneset e tjera.
“Prej vitesh shohim edhe një fenomen, që është efekt domino. Ende nuk ka rënë ajo dominoja e parë, për të marrë me vetë shumë të tjerë. Të gjithë duan të punojnë më paratë e të tjerë. Ka rrjete biznesesh apo dyqanesh restorantesh që punojnë me paratë e distributorëve. Por këto janë fatura të papaguara që krijojnë ngërç në aktivitetin e tyre. Të gjitha këto krijojë një vakum të parave në ekonomi. Sot dikush, që hap një restorant, furnizimin e parë nuk e parashikon si investim, por mendon se do t’ia sjellin furnitorët se do të jem klient i tyre. Nuk mund të jetë kjo qasje apo vizion i të bërit biznes”, sqaron Jahaj.
Në Shqipëri numërohen rreth 15 mijë bare dhe restorante në të gjithë vendin. Kjo shifër konsiderohet e lartë për një treg si Shqipëria.
/vizionplus.tv
