Eksperti i sigurisë Dritan Goxhaj ka analizuar luftën në Lindjen e Mesme. I ftuar në emisionin Quo Vadis në Vizion Plus, të moderatores Pranvera Borakaj, Goxhaj tha se kjo është një luftë e nisur vite më parë mes BRICS dhe NATO të udhëhequr nga Shtetet e Bashkuara të Amerikës.
Sipas tij, qëllimi i Irani nuk është të fitojë luftën, por ta zgjasë atë për t’i dhënë hapësirë vendeve të BRICS.
I pyetur se përse Irani po sulmon vendet e Gjirit, ai tha se kjo bëhet për të krijuar inflacion të dollarit, gjë që mund të sjellë rënie të qeverisë në SHBA.
Pjesë nga biseda:
Borakaj: Mendon se jemi drejt një rendi të ri botëror?
Goxhaj: Ajo që po ndodh është një përplasje konceptesh. Në një krah janë Rusia, Kina dhe Irani, dhe në krahun tjetër SHBA dhe vendet e tjera. SHBA sot është fuqia e vetme detare. Pra kush do të mbizotërojë, kjo është përplasja e koncepteve. NATO është Amerika dhe pjesa tjetër është BRICS. Përplasja ka nisur ekonomike dhe është e pashmangshme të bëhet edhe ushtarake. Nisi fillimisht si përplasje ushtarake në Ukrainë, me qëllim që të shiheshin lidhjet që palët kishin. Irani është baza kryesore, jo Rusia.
Borakaj: Sa është dobësuar Irani nga kjo përplasje?
Goxhaj: Nuk është dobësuar. Numri i viktimave është shumë herë më i madh. Në janar u bënë protesta në Iran dhe Perëndimi tha se u vranë 30 mijë veta. Imagjinoni sa janë vrarë nga raketat. Çështja e dobësimit hyn tek strategjia. SHBA e nisi me idenë të jepte rezultate strategjike që të binte qeveria, por kjo nuk u arrit. Irani godet në nivel taktik, duke goditur 8 radarë, që janë kryesorët e SHBA. Njëri ishte radar me rreze 5 mijë km. Ky radar mbulonte edhe raketat që Rusia lëshonte në Ukrainë. Goditja është në nivel strategjik për të ndihmuar Rusinë. Sot nuk mund të detektohen raketat. E kuptoni nivelin strategjik. Irani e ka pasur këtë nivel strategjik. Irani nuk ka plan fitoren e luftës. Irani sheh se sa më shumë zgjat lufta dhe qeveria nuk bie, ai është i fituar.
Borakaj: Po strategjia për të goditur vendet e tjera arabe?
Goxhaj: Pjesë e strategjisë.
Borakaj: Çfarë fiton?
Goxhaj: Vendet arabe kanë ndërprerë prodhimin e naftës dhe gazit. Pra dollari amerikan është i bazuar në naftë dhe kur dollari mbetet në banka krijon inflacion, dhe kjo sjell rënie të qeverisë. Pra kjo është lufta që po bëhet. Baza e vendeve të Gjirit është dollari dhe gjithë dollarët që marrin vendet e Gjirit i çojnë në bursën amerikane.
