Kryeministri Edi Rama prezantoi këtë të hënë emrat kryesues të kandidatëve për deputetë në 12 qarqe. Ai u pyet nga gazetarët pse ish-ministri i Jashtëm, Ditmir Bushati u la jashtë listës për deputet në qarkun e Shkodrës.
Si përgjigje, kreu i qeverisë dha se kjo është një betejë dhe se skuadra e Partisë Socialiste është shumë më tepër sesa skuadra e deputetëve.
“Në këtë betejë, yll është vetëm skuadra. Skuadra e PS është shumë më tepër se skuadra e deputetëve. Nëse çfarë kemi arritur e kemi arritur sepse kemi pasur një skuadër kompetitive, çfarë nuk kemi arritur apo nuk ka shkuar mirë duhet përsëri të adresohet në sensin e skuadrës, në sensin e vendosjes së qëllimeve të përbashkëta, pa egoizma. Ata që kanë marrë më shumë, kanë për të dhënë edhe më shumë, me siguri. Ka një kohë për të marrë, ka edhe një kohë për të dhënë”, deklaroi Rama.
