Enri Jahaj nga Shoqata e Bareve dhe Restoranteve nuk e konsideron një hap të ri vendimin e Ministrisë së Shëndetëisë për hapjen e ambienteve të brendshme.
I ftuar në edicionin e lajmeve në “Vizion Plus”, ai theksoi se protokolli i sigurisë i hartuar nga qeveria është vazhdim i të vjetrit. Ndërsa e quajti një hapje fiktive, Jahaj vuri në dukje se zbatimi i detyrimeve i adresohen vetëm subjektit, dhe jo individëve që frekuentojnë ambientet. Sipas tij, kriza e pandemisë sapo ka filluar.
“Protokolli i ri është vazhdim i atij të vjetrit, por pa marrë parasysh hallet dhe problemet. Ne gjendemi përballë faktit që duhet të zbatojmë disa protokolle, por gjithmonë protokolli i atashohet subjektit dhe jo individit. Pjesa më e goditur nga pandemia kanë qenë klubet e natës. Nuk flitet vetëm për ambientet e lokalit, por flitet për qiradhënësit, artistët, muzikantët; për një sektorë të tërë që jo vetëm nuk ka marrë mbështetje, por mbetet i penalizuar. Është hapje gjysmake. Thjesht po hapemi fiktivisht. Individet nuk kanë asnjë masë, asnjë detyrim, vetëm subjekti. Ne jemi më të goditurit. Pjesa tjetër, jo”, deklaroi Jahaj.
Për Jahajn, në 6 muaj pandemi, gjendja në sektorin e tij vijon të mbetet problematike, ndërsa e konsideroi një vendim absurd ndalimin e hapjes së klubeve të natës dhe muzikën pas orës 20:00.
“Grupi i ekspetëve le të dalë dhe të japë një statistikë nëse ka pasur një gjë të mirë ai vendim a jo. Për ne, vazhdon të mbetet vendim absurd. Gjendja e sektorit tonë vazhdon të jetë shume e keqe, tmerrësisht problematike. 20 për qind ka shkuar drejt falimentit, në Tiranë dhe në rrethe. Kriza tani sapo ka filluar. Nga shtatori deri në dhjetor, do të jetë një krizë shumë e madhe. Sepse edhe klientët kanë frikë t’i frekuentojnë baret edhe restorantet. 30 për qind e të gjitha bareve dhe restoranteve punojnë në mënyë të cunguar.”
