Protestuesit italianë thirrje në Telegram për përplasje me policinë, shteti merr masa

Italia po përgatitet për një fundjavë tjetër protestash, ndërsa policia druhet se në disa qytete mund të ketë sërish përplasje të dhunshme. Situata po ndiqet veçanërisht në Milano, Torino dhe në zonën e Kazertës, por edhe në qytete të tjera si Komo dhe Bari.

Shqetësim ka edhe për Romën, ku autoritetet dyshojnë se persona të prirur për përplasje mund të organizojnë thirrje të rreme për grumbullime në Circus Maximus dhe sheshe të tjera. Sipas skenarit që po shqyrtohet, qëllimi mund të jetë shpërndarja e forcave të policisë në disa pika të kryeqytetit, ndërsa grupe të tjera të përqendrohen te marshimi kundër militarizimit dhe NATO-s në sheshin e Republikës, ose të zhvendosen drejt rrugëve të qendrës.

Sipas gazetës italiane Corriere della Sera, shqetësimet lidhen me protestat e planifikuara për pasditen e së shtunës, 24 tetor, dhe të dielën, 25 tetor, pas përplasjeve të dhunshme të fundjavës së kaluar.

Në të njëjtën kohë, në Itali është ndezur një debat politik pas deklaratave të ministrit të Drejtësisë, Carlo Nordio, i cili kërkoi zgjerimin e kapaciteteve të burgjeve për të mitur. Në një intervistë për SkyTg24, ministri foli edhe për mundësinë e përdorimit të disa hapësirave të burgjeve për të rritur si ambiente për të miturit.

Ministri kërkon më shumë vende në burgjet për të mitur, opozita: Duhet të largohesh

Nordio e argumentoi propozimin me vështirësitë që po kalon sistemi i burgjeve për të mitur dhe me numrin e lartë të arrestimeve.

“Sistemi i burgjeve për të mitur aktualisht është vërtet në vështirësi. Ka pasur një seri arrestimesh masive të të miturve, diçka që nuk kishte ndodhur kurrë më parë. Ka momente kur, për fat të keq, është e nevojshme t’i dërgosh pas hekurave këta të mitur të dhunshëm”, deklaroi ai.

Këto deklarata sollën kundërshtimin e partive opozitare, të cilat kritikuan mënyrën se si ministri propozon të përballet me dhunën e të rinjve.

Kreu i Lëvizjes Pesë Yjet, Giuseppe Conte, kërkoi largimin e Nordios nga detyra.

“Nordio ka deklaruar se përgjigjja ndaj dhunës janë arrestimet masive të të rinjve dhe zgjerimi i burgjeve për të mitur. Kjo do të thotë se nuk je politikan: duhet të shkosh në shtëpi”, tha Conte.

Edhe Matteo Mauri, përgjegjës për çështjet e sigurisë në Partinë Demokratike, e kritikoi ministrin, duke deklaruar se ai “nuk humbet kurrë rastin për të ulur nivelin e dinjitetit të kësaj qeverie”.

Devis Dori, përfaqësues i Aleancës së të Gjelbërve dhe të Majtës në Komisionin parlamentar të Drejtësisë, tha se Nordio kishte shkuar kundër parimeve të Kushtetutës italiane.

“Këtë herë e ka tepruar, duke u vendosur plotësisht jashtë frymës së Kushtetutës”, deklaroi Dori.

Ish-ministri i Drejtësisë, Andrea Orlando, nga Partia Demokratike, përdori një krahasim ironik me dy figura të historisë së drejtësisë italiane.

“Donte të bëhej Vassalli. U bë Alfredo Rocco, madje një version i dobët i tij”, tha Orlando.

Ndërsa sekretari i partisë +Europa, Riccardo Magi, e cilësoi Nordion si “fytyrën e egër të shtypjes së kësaj qeverie”.

Ndërkohë, mijëra të rinj pritet të dalin të shtunën në rrugët e Torinos për një marshim kundër riarmatimit, të organizuar edhe nga qendra sociale Askatasuna.

Në Castel Volturno, në zonën e Kazertës, është planifikuar një protestë përpara një qendre ku mbahen emigrantët në pritje të riatdhesimit. Në të pritet të marrin pjesë përfaqësues të lëvizjeve, sindikatave dhe organizatave të ndryshme, mes tyre Cgil, Legambiente, Emergency dhe Libera.

Roma nën masa sigurie, “Lëvizja 17 Tetori” shpërndan udhëzime në Telegram

Ministria e Brendshme italiane po ndjek situatën, ndërsa në terren është angazhuar një numër i madh efektivësh policie.

Sa i përket përdorimit të ushtarëve në Milano, ministri i Mbrojtjes, Guido Crosetto, sqaroi se nuk ka kërkuar kompetenca të veçanta për ta.

“Nuk kam kërkuar asnjë kompetencë të veçantë për ta, por vetëm që të kishin të njëjtat mundësi për t’u mbrojtur si forcat e tjera të rendit”, deklaroi Crosetto.

Në Romë, masat e sigurisë janë përforcuar në rrugët kryesore tregtare, ndërsa policia po ndjek me kujdes grumbullimet e të rinjve, sidomos në qendër.

Për fundjavën është planifikuar një tjetër marshim kundër militarizimit, që do të shkojë deri te Forumet Perandorake, si dhe një tubim i së djathtës në lagjen Prati.

Por dy tubime të tjera janë njoftuar vetëm përmes rrjeteve sociale. Njëri prej tyre është thirrur nga grupi i quajtur “Lëvizja 17 Tetori”, i cili mbrëmjen e së enjtes shpërndau në Telegram një dokument të titulluar “Udhëzues taktik kolektiv”.

“Të dalim të gjithë në shesh dhe të marshojmë në rreshta paralelë, të thërrasim sloganet tona dhe të përpiqemi të çajmë barrikadat”, thuhet në dokument.

Në material përfshihen edhe këshilla për pajisjet që protestuesit duhet të marrin me vete. Përmenden syze mbrojtëse, shami palestineze, mbi të cilën sugjerohet të hidhet uthull, veshje me kapuç, doreza kuzhine, çantë e ndihmës së shpejtë dhe ilaçi Maalox në formë të lëngshme. Autorët i paraqesin këto si mjete mbrojtëse ndaj gazit lotsjellës.

Në dokument jepen edhe udhëzime për afrimin e turmës drejt forcave të policisë.

“Sa më shumë turma t’u afrohet rreshtave të forcave të sigurisë, aq më pak mundësi kanë ato të hedhin gaz lotsjellës. Dhe aq më shumë rritet presioni ynë ndaj tyre”, thuhet në material.

“Revolucioni, udhëzime për përdorim”, dokumenti tjetër që qarkullon në rrjetet sociale

Në Instagram është publikuar edhe një dokument tjetër, i titulluar “Revolucioni, udhëzime për përdorim”, ku përshkruhen mënyra organizimi dhe veprimi gjatë protestave.

Autorët flasin për “objektiva taktikë të mosbindjes civile”, duke përmendur kundërshtimin e qeverisë së Giorgia Melonit dhe politikave të saj, zgjerimin e protestave dhe mbrojtjen e pjesëmarrësve.

Sipas Corriere della Sera, gjuha, mënyra e organizimit dhe karakteristikat e shkrimit ngjajnë me ato të grupeve anarkiste dhe lëvizjeve radikale kundër sistemit. Megjithatë, nuk është e qartë nëse autorët janë të njëjtët persona që kanë shpërndarë mesazhe të ngjashme gjatë viteve të fundit.

Dokumenti përshkruan disa faza të mobilizimit. Fillimisht u sugjerohet pjesëmarrësve të mblidhen me miq, të njohur dhe kolegë larg pranisë së policisë, në atë që quhet grumbullim paraprak.

Më pas këshillohet që të ftohen kalimtarët dhe banorët për t’iu bashkuar protestës, të dilet në grupe të mëdha drejt rrugëve kryesore dhe të marshohet së bashku drejt vendit të paracaktuar të grumbullimit.

Për pjesëmarrësit rekomandohen edhe këpucë të rehatshme, që të mund të lëvizin dhe të vrapojnë shpejt.

“Mbroni njëri-tjetrin”, udhëzimet për protestuesit në rast përplasjesh

Një pjesë e dokumentit i kushtohet mënyrës se si protestuesit duhet të veprojnë në rast përplasjesh me policinë.

“Nëse fillojnë të godasin, rreshtat e parë të tërhiqen disa hapa”, thuhet në udhëzues.

Autorët këshillojnë gjithashtu që sloganet të mos ndërpriten dhe të përdoren vetëm një ose dy thirrje të thjeshta, në mënyrë që të gjithë t’i dëgjojnë dhe t’i përsërisin lehtësisht.

Në rast të përdorimit të gazit lotsjellës, dokumenti u kërkon pjesëmarrësve të ruajnë qetësinë, me pretendimin se paniku bën që të thithet më shumë tym.

“Nëse dëgjoni shpërthime, mos vraponi, qëndroni në rresht dhe mbroni kokën. Duhet ta dini gjithmonë se efekti i tyre është i përkohshëm”, thuhet më tej.

Por theksi kryesor vendoset te mbështetja mes pjesëmarrësve.

“Gjëja më e rëndësishme është të mbrojmë njëri-tjetrin. Secili të kujdeset për personat që ka pranë. Secili është përgjegjës për mbrojtjen e dy personave që ka në të djathtë dhe në të majtë, si dhe të personit pas tij, në mënyrë që të krijohet një zinxhir komunikimi dhe mbështetjeje”, thuhet në dokument.

Autorët theksojnë gjithashtu se ndihma ndaj pjesëmarrësve të tjerë është më e rëndësishme sesa përballja me forcat e sigurisë dhe u kërkojnë protestuesve të mos lejojnë që agjentë të policisë të depërtojnë në turmë.

“Mos qëndro pasiv dhe i padobishëm, edhe ti je pjesë e revolucionit”, është një tjetër thirrje e dokumentit.

Policia kontrollon rreth 100 persona në 18 qytete, mes tyre 51 të mitur

Ndërkohë, policia italiane dhe agjentët e Digos, strukturës së specializuar që merret me hetimet për sigurinë, kanë zhvilluar një operacion të gjerë kontrollesh ndaj personave të dyshuar për përfshirje në trazirat e 17 dhe 18 tetorit.

Janë kryer kontrolle personale dhe banesash ndaj rreth 100 personave të identifikuar gjatë hetimeve për përplasjet e dhunshme dhe dëmtimet e shkaktuara gjatë manifestimeve.

Mes personave që po hetohen janë 51 të mitur.

Operacioni është shtrirë në 18 qytete italiane, kryesisht në veri të vendit: Aosta, Areco, Bari, Bergamo, Bolonja, Bolcano, Komo, Kremona, Firence, Xhenova, Lodi, Monca, Napoli, Padova, Peskara, Vareze, Verbania dhe Verona.

Veprat penale për të cilat po hetohen personat e përfshirë, sipas rasteve, janë kundërshtimi i punonjësve të policisë, plagosja, dëmtimi i pronës, mbajtja e armëve ose sendeve të rrezikshme, fshehja e identitetit dhe hyrja e paligjshme në prona apo ndërtesa.

Hetimet po vazhdojnë edhe për të parandaluar incidente të tjera. Policia po monitoron rrjetet sociale dhe bisedat në internet për të ndjekur organizimin e protestave të reja.

Thika, shkopinj metalikë dhe bidonë me benzinë, çfarë sekuestroi policia

Gjatë kontrolleve, agjentët e Digos kanë sekuestruar telefona celularë, kompjuterë dhe pajisje të tjera elektronike.

Janë gjetur gjithashtu armë imituese që përdoren në lojëra luftarake, sende të përshtatshme për të shkaktuar dëmtime, municione luftarake, armë të ftohta, thika, shkopinj teleskopikë, doreza metalike për goditje, shkopinj të rëndë, shkopinj policie, shufra alumini, një hark mekanik dhe bidonë plastikë me benzinë.

Policia ka sekuestruar edhe veshje që mund të përdoren për të fshehur identitetin, si maska që mbulojnë fytyrën dhe qafore, si dhe rroba të vjedhura nga dyqanet gjatë protestave të fundit.

Agjentët e Digos po vazhdojnë hetimet për të identifikuar persona të tjerë që mund të jenë përfshirë në veprime të paligjshme gjatë manifestimeve.