Qytetarët e Durrësit të cilët janë prekur nga projekti “TID” vijuan protestën e tyre edhe këtë të shtunë.
Për t’i sqaruar rreth këtij projekti, në bashkinë e qytetit bregdetar shkoi vetë kryeministri Edi Rama, i cili zhvilloi një bashkëbisedim me banorët.
Pas përfundimit të takimit, Rama tha se është arritur një dakordësi me banorët dhe se do të bëhet vlerësimi i disa banesave që pretendohet se mbartin vlera kulturore.
Gjithashtu tjetër problem që do të rishikohet është dhe statusi i disa shtëpisë që nuk disponojnë hipotekë. Rama tha se projekti do të vijojë dhe se do të rishikohen referencat e reja përsa i përket vlerës së dëmshpërblimit të shtëpive.
“Me 34 qytetarë të Durrësit, përfaqësues të familjeve që kanë këtë problematikë, kemi folur rreth 2 orë. Ata që kanë hallin, me ta kemi folur. Biseda ka qenë konstruktive, me opinione të ndryshme. 35 të tjerë atje, që nuk përfaqësojnë as qytetin as qytetarët, por vetëm hallin e një 80 e kusur vjetari, të rrjedhur nga çdolloj rruge të arsyes, krijojnë situata që janë qesharake dhe që tregojnë se ku është katandisur ajo parti. Sa i përket problemit të vërtetë, kemi rënë dakord se si do të shkojmë përpara, qoftë me atë verifikimin e nevojshëm për objekte që mund të kenë vlera të trashëgimisë kulturore. Do të ketë prishje, nuk do të ndalet, por do të bëhet verifikim për disa shtëpi që pretendohet se janë trashëgimi kulturore dhe disa shtëpi që nuk kanë marrë regjistrimin në hipotekë. E kemi diskutuar edhe çështjen e çmimit dhe do të duhet të shohim referencat e reja”, tha kryeministri Rama.
Banorët e Durrësit thonë se shpronësimet po bëhen me vlera qesharake dhe në mënyrë selektive.
Ndërkohë, bashkia e durrësit u ka bërë thirrje banorëve që deri më 16 shkurt të lirojnë vullnetarisht banesat e tyre, në mënyrë që të vijojë zbatimi i projektit.
