Koalicioni qeveritar vendosi: Ilir Meta është kandidati për postin e Presidentit të Republikës. Pasditen e së premtes, ligjvënësit do të votojnë për të zgjedhur kreun e ardhshëm të shtetit. Mbështetja për kandidaturën e Metës erdhi pas një pasdite intensive lëvizjes politike. Menjëherë pas përfundimit të raundit të tretë të votimit, ku nuk u paraqit asnjë kandidaturë e për këtë shkak dështoi, në selinë e LSI-së pasdite është mbledhur grupi parlamentar për të diskutuar mbi hapat që do të hidhen në funksion të zgjedhjes së Presidentit në raundin e 4-t.
Gjatë mbledhjes, mësohet se kreu i LSI-së është shprehur se partia që përfaqëson t’i propozojë aleatëve socialist dy kandidatura. Ndërkohë që janë mbledhur firmat për mbështetjen e kandidaturës së Metës. Pas këtij momenti u vendos që Ilir Meta dhe Petrit Vasili, të jenë dy emrat që do të shkonin për të marrë mbështetje nga PS.
Pas përfundimit të mbledhjes, Ilir Meta dhe Edi Rama u takuan në Rezidencën Qeveritare pranë Kryesisë së Kuvendit. Takim, i cili u pasua me mbledhjen e kryesisë së PS-së. Pas mbi një orë e gjysmë mbledhje, Taulant Balla njoftoi përkrahjen që PS i jep kandidaturës së Metës për President të Republikës. Lëvizjet vijnë pas një deklarate të ashpër të kreut të grupit parlamentar socialist Gramoz Ruçi në Parlament, i cili i bëri thirrje për zgjedhje të Presidentit nga kjo mazhorancë.
Kushtetuta e Shqipërisë përcakton 5 raunde votimi për zgjedhjen e Presidentit. Nga këto, në 3 raundet e para kandidati duhet të marrë të paktën 84 vota deputetësh, ndërkohë që në raundin e 4-t dhe të 5-të kreu i shtetit mund të zgjidhet edhe me shumicë të thjeshtë votash. E nisur nga fakti se tre raundet e para janë djegur, Ilir Metës i mjaftojnë 71 vota për tu zgjedhur President, edhe pse koalicioni ka vota edhe sikur të ishin të nevojshme shumicë e cilësuar.
