Votuesit në Portugali do t’i drejtohen sërish kutive të votimit të dielën për raundin përfundimtar të zgjedhjeve presidenciale, në një proces të dominuar nga përpjekjet për të frenuar kandidatin e ekstremit të djathtë, por edhe edhe i lënë në hije nga stuhitë vdekjeprurëse që kanë goditur vendin ditët e fundit.
Kandidati i majtë, António José Seguro, kryesoi raundin e parë të zgjedhjeve të mbajtura më 18 janar, duke siguruar 31.1% të votave.
Në vendin e dytë u rendit André Ventura, lideri i partisë së ekstremit të djathtë Chega – tashmë forca e dytë më e madhe parlamentare – me 23.5% të votave.
Përpara se fushata të ndërpritej pothuajse zyrtarisht nga dy stuhi vdekjeprurëse dhe shkatërruese, disa figura konservatore në vend shfaqën një unitet të rrallë, duke deklaruar mbështetjen e tyre për Seguro-n, në një përpjekje për të shmangur mundësinë e një presidenti nga e djathta ekstreme. Të tjerë, përfshirë kryeministrin e qendrës së djathtë të Portugalisë, Luís Montenegro, kanë refuzuar t’i japin mbështetje kandidatit socialist.
Sondazhet sugjerojnë se edhe votuesit po rreshtohen rreth Seguro-s. Sipas një ankete , kandidati socialist kryeson me 67% ndaj 33% të Ventura-s.
Nëse këto parashikime rezultojnë të sakta, Seguro do të sigurojë rezultatin më të lartë për një kandidat presidencial në mandatin e parë në pesë dekadat që nga përmbysja e regjimit autoritar në Portugali.
Megjithatë, nëse Ventura arrin të sigurojë më shumë se 32% të votave, Chega do të ketë fituar një përqindje më të madhe votash sesa Partia Socialdemokrate në pushtet në zgjedhjet e fundit parlamentare.
Analistët thonë se vetëm ky fakt mund të shënojë një tjetër moment kyç politik, pasi një president i ekstremit të djathtë në Portugali do të ndiqej me shqetësim nga BE-ja dhe partnerët europianë, edhe pse vendi do të mbetej i lidhur me strukturat europiane dhe NATO-n.
