Policia e Shtetit bëri një reagim publik lidhur me rrëmbimin dhe vrasjen e Jan Prengës në Kamëz. Duke marrë shkas nga lajmet e shumta të këtyre ditëve për këtë ngjarje, policia sqaroi se Jan Prenga është vrarë në ditën e rrëmbimit. Sipas njoftimit të policisë, ai ka mbërritur në resortin në Shijak pa shenja jete.
“Grupi i posaçëm hetimor krijoi bindjen e plotë të bazuar mbi prova se shtetasi J. P. mund të mbahej peng në resortin në pronësi të shtetasit A. H., banues në Shijak. Mbi bazën e këtyre informacioneve u hartua plan-operacioni dhe u zhvillua operacioni policor i koduar “Resorti”. Duam të theksojmë se Policia e Shtetit disponon prova të pakundërshtueshme se shtetasi J. P. ka ndërruar jetë më datë 17 janar, pra ditën e rrëmbimit, dhe se në resort është dërguar pa shenja jete.”
Policia e Shtetit theksoi se kërkimet për trupin e pajetë të Jan Prengës po vijojnë.
Mëngjesin e kësaj të enjteje policia kreu një aksion në Shkodër ku u siguruan prova të rëndësishme për zbardhjen e vrasjes së pengut, Jan Prenga.
Ka dyshime të forta se urdhëruesit e marrjes peng të Jan Prengës janë një grup i fuqishëm kriminal në Shkodër. 49-vjeçari Jan Prenga pasi u mor peng, është vrarë dhe provat janë siguruar nga kamerat e bodrumit të resortit “Golden” në Shijak në pronësi të familjes Hajri.
