Policia në Durrës ndërmori një aksion për të kapur persona të shpallur në kërkim, ata që qarkullojnë me armë zjarri e lëndë narkotike apo ata që kanë vjedhur banesa e lokale.
Në një taksi, efektivët i gjetën pasagjerit të fshehur në çantën e tij , 2 granata dore, 4 kapsolla detonatore, 491 gramë lëndë eksplozive e dyshuar si C4 dhe 490 fishekë luftarak. Samed Lisaj, 28 vjeç, banues në Shkodër, u arrestua si i akuzuar për trafikim të municionit luftarak.
Gjatë aksionit u prangos edhe një durrsak 50-vjeçar, i akuzuar për vjedhje të ndryshme në makinat e qytetarëve. Kurse në Krujë u kap një 64-vjeçar i shpallur në kërkim sepse në oborrin e banesës së tij u gjetën të kultivuara bimë kanabisi.
