Një lamtumire qe do ta ëndërronte çdokush…Kështu që mund të konsiderohet ndeshja e fundit me përfaqësuesen gjermane për Lukas Podolskin, i cili e mbylli karrierën me “panterat” si kapiten dhe mbi të gjitha me një gol, me të cilin Gjermania mundi 1 me 0 Anglinë.
Emocione te mëdha në “Signal Iduna Park” në Dortmund para ndeshjes, teksa koreografia që ishte përgatitur për sulmuesin 32-vjeçar, ishte vërtet mbresëlënëse.
Sa i takon kronikës së ndeshjes, anglezet ishin më mirë në pjesën e parë me Vardin që pretendoi për një penallti shumë shpejt pas një kontakti me Ter Stegen, ndërsa në minutën e 25 Lallana gjeti shtyllënm pasi kishte befasuar edhe mbrojtjen vendase. Në fund të kësaj pjesë një mrekulli e Ter Stegen ndaj Delle Ali i mohoi golin “Tre Luanëve”.
Pjesa e dytë ka një pamje ndryshe. Gjermanet janë më agresive dhe Brand fillimisht rrezikon portën angleze përpara se protagonist të bëhet sërish Ter Stegen ndaj Dier. Gjithsesi ndeshja do të vendoset në të 69 kur protagonisti i mbrëmjes bëhet në të gjitha drejtimet Lukas Podolski me një eurogol nga distance.
Ky ishte goli numër 49 ne kombëtaren gjermanë për sulmuesin, i cili la fushën e lojës mes duartrokitjeve pa fund të tifozerisë gjermane, e cila e ka parë Poldin me fanellën e kombëtares në plot 130 takime që nga 2004 kur bëri debutimin e deri me tani.
Sulmuesi me origjine polake, i cili ne karrierën e tij ka luajtur me disa klube të njohura si Keln, Bayern Mynih, Arsenal, Inter e tashmë pjesë e Gallatasarait, i jep lamtumirën kombëtares gjermane me arritje vërtet mbresëlënëse pasi veç aspektit individual, ai ka qenë pjesë e skuadrës fituese te kupës së botës ne 2014 dhe finalist i Evropianit të 2008.
