Koordinatori i “Bindjes Demokratike”, Astrit Patozi tregon në një postim të publikuar në rrjetin e tij social “Facebook” se si po tentohet të përsëritet fushata elektorale e vitit 2017 nga aktorët politikë.
Patozi i bën thirrje qytetarëve që të “zënë veshët dhe hundët me duar” kur të dëgjojnë e shohin se si i vërsulen njëri-tjetrit. Sipas tij, terminologjia që përdorin për të etiketuar njëri-tjetrin është një arsye më shumë se përse duhen refuzuar në zgjedhjet parlamentare të 25 prillit.
“Nuk e kthen dot mbrapa 2017-ën, timonier! Mos prisni një fushatë qytetare, me alternativa, programe apo me ekipe dinjitoze prej 3 kuajve të lodhur të skenës sonë politike, se do të zhgënjeheni prapë. Nuk keni për të gjetur asgjë nga këto, por vetëm gallatë, barcaleta dhe batuta të ndryshkura, që gjithçka të mbetet si më parë. Ky në fakt, ka qenë edhe qëllimi i marrëveshjes famëkeqe të 5 qershorit, të cilën dikush po thotë se i qëndron deri në vdekje dhe tjetri po bën sikur po e qan. Nuk ka nevojë të jesh profet për ta parashikuar fushatën e atyre që përfaqësojnë stanjacionin me qeverisjen e korruptuar të Edi Ramës, dhe të tjerëve, që po tundin flamurin e rreckosur të vetëm rotacionit, me argumentin se nuk lejohet të humbasësh më shumë se 8 vjet rresht. Ndaj zero kërshëri dhe zero vëmendje ndaj atyre, që i kanë dhënë të gjitha provat dhe argumentet në këto 30 vjet, se nuk mund të vijë më asgjë e mirë prej tyre për Shqipërinë. Ndaj përgatituni që tani të zini veshët dhe hundët me duar, kur të dëgjoni dhe shikoni se si do t’i vërsulen njëri-tjetrit me një tërbim, që do të vijë në ngjitje me afrimin e datës së zgjedhjeve. Terminologjia që përdorin për të etiketuar njëri-tjetrin, si kur dalin nga takti, ashtu edhe kur duan të tallen, është një arsye më shumë se përse duhen refuzuar në bllok më 25 prill. Vrasës, hajdut, xhahil, artist, gjumash, i metë, i shkalluar, imoral, delenxhi etj, mund të ngjajnë epitete të lehta, pas disa ditësh, kur ethet e fushatës të rriten. Janë të gjitha shenjat se po tentohet të përsëritet 2017-a dhe është jashtë çdo dyshimi që prej kësaj déjà vu-je përfituesi kryesor, në mos i vetmi, është Edi Rama.”
Për Patozin, vetëm nja apo disa alternativa të reja, që synojnë realisht ndryshimin, mund ta shmangin “neverinë dhe boshllëkun që shkakton përleshja e 3-4 gjelave të politikës primitive”.
