“Po sulmohen policë e dëmtohen biznese”, Koçiu: Kërkesat e studentëve të dëgjohen e të marrin zgjidhje

Zëvendëskryeministrja Albana Koçiu ka reaguar për protestën që po zhvillohet në Tiranë dhe në disa qytetet të tjera.

Koçiu tha se shqetësimet e studentëve duhet të dëgjohen dhe kërëkesate tyre të marrin zgjidhje.

Reagimi i Albana Koçiut:

Qyteti “Studenti” vendi ku të rinjtë duhet të ndihen të sigurtë, dje u kthye në shënjestër të dhunës. Një hapësirë e dijes, e ëndrrave dhe e së ardhmes u shndërrua në skenë frike dhe vandalizmi.

Jam sot këtu për të thënë qartë se ajo që po ndodh prej katër ditësh në Tiranë është e papranueshme!

Institucione të djegura, biznese të shkatërruara, qytetarë të terrorizuar dhe punonjës policie të sulmuar.

Kjo nuk është protesta e studentëve! Studentët nuk shkatërrojnë konviktet, nuk frikësojnë bashkëmoshatarët, nuk dhunojnë shkollat dhe vendin e tyre. Padiskutim, e kemi thënë në krye të heres se ata meritojnë të dëgjohen dhe kërkesat e tyre të marrin përgjigje.

Shteti do të mbrojë qytetarët dhe çdo akt dhune do të hetohet deri në fund.

Shqipëria nuk mund të mbahet peng nga dhuna, maskat dhe frika!

Kemi kapërcyer sprova shumë më të mëdha dhe do ta kapërcejmë edhe këtë.

Shqipëria e ka zgjedhur të ardhmen e saj, zhvillimin dhe familjen europiane.

Nga këtu dua të inkurajoj studentët që jetojnë në këto godina të jenë të qeta dhe dua po nga këtu të përcjell një falenderim për të gjithë efektivët e policisë së shtetit dhe dua të kërkoj nga të gjithë, lutem bashkëpunoni, policia e shtetit është aty për të garantuar sigurinë dhe rendin publik.