Plagoset një person në Laç, të shtëna me armë gjatë operacionit për arrestimin e të kërkuarit
Një aksion i forcave të policisë së Lezhës është zhvilluar gjatë natës për kapjen e një personi në kërkim në lagjen numër katër në Laç.
Por, në momentin e ndërhyrjes për ndalimin e tij, efektivët kanë dëgjuar të shtëna me armë dhe menjëherë janë vënë në ndjekje të automjetit që lëvizte me shpejtësi, pasi u pikas nga policia. Gjatë ndjekjes, automjeti që drejtohej nga i kërkuari, në tentativë për t’iu shmangur efektivëve, është përplasur me automjetin e policisë.
Megjithatë, efektivët arritën t’i vinin prangat 28-vjeçarit. Ndërkohë, dyshohet se para se të ndërhynte policia për kapjen e të kërkuarit, në automjet ndodheshin dhe dy persona të tjerë.
Gjatë një konflikti për motive të dobëta, dyshohet se një i afërm i 28-vjeçarit ka plagosur me armë 26-vjeçarin tjetër që ndodhej në makinë me të, të cilin shërbimet e policisë e transportuan në spital.
/vizionplus.tv
