Kosova ngriti menjëherë kokë pas humbjes në sfidën e parë kundër Rumanisë, duke u rikthyer bindshëm me një fitore të bukur kundër Qipros në transfertë.
Sukses 4 me 0 që nuk lë hapësirë për interpretime të ndeshjes.
Dardanët ishin dominues nga fillimi në fund duke mos vuajtur aspak tensionet e ditëve të fundit dhe polemikat forta të përjashtimit të tre lojtarëve për arsye disiplinore, mes të cilëve edhe ylli i Lile, Edon Zhegrova.
Për të udhëhequr skuadrën në këtë duel të dytë të ligës së kombeve, mendoi një tjetër lojtar cilësor, e me përvojë.
Vedat Muriqi shënoi dy herë deri në gjysmën e pjesës së parë.
Fillimisht me 11-metërsh në minutën e 9. E pastaj dyfishoi rezultatin në minutën e 21 me kokë, një specialitet i “Piratit”.
Ermal Krasniqi pati një rast të pastër në fundin e pjesës së parë. Por atë që se bëri ai, e realizoi Amir Rrahmani në nisje të pjesës së dytë pas një top të Rashicës.
Vetëm 7 minuta më vonë Dellova e ktheu në goleadë këtë sfidë, ku nota më negative ishin banderolat e tifozëve vendas: “Kosova është Serbi“ për të cilat me siguri Qipro do të dënohet nga Uefa.
Ky grup udhëhiqet ndërkohë nga Rumania me 6 pikë të plota. Pasi mundën Kosovën, viktima këtë herë e skuadrës së Mircea Luceskut ishte Lituania e cila u mund 3 me 1.
Mihaila, Razvan Marin dhe Mitrica shënuan për vendasit ndërsa Kucis kishte barazuar përkohësisht shifrat për kombëtaren balltike./vizionplus.tv
