Tensionet mes Shteteve të Bashkuara dhe Iranit janë rritur sërish, pasi Teherani ka paralajmëruar se do të godasë infrastrukturën rajonale nëse Uashingtoni sulmon ura ose centrale elektrike në territorin iranian.
Reagimi vjen pas deklaratës së presidentit amerikan Donald Trump, i cili tha se SHBA-ja do të bombardojë objekte të tilla sa herë që Irani sulmon anije tregtare në Ngushticën e Hormuzit.
Një burim ushtarak iranian, i cituar nga agjencia Tasnim, deklaroi se vendi ka vendosmëri të plotë për të mbrojtur sovranitetin e tij dhe nuk do të lejojë që kjo rrugë strategjike detare të përdoret si kërcënim ndaj Iranit.
Sipas tij, lundrimi në Ngushticën e Hormuzit do të mbetet i sigurt vetëm për anijet që respektojnë rregullat dhe koordinohen me autoritetet iraniane.
Ai paralajmëroi se çdo sulm amerikan ndaj infrastrukturës iraniane do të pasohet me goditje ndaj objekteve energjetike dhe infrastrukturës rajonale ku Shtetet e Bashkuara kanë interesa
Paralajmërimet vijnë në një kohë kur forcat amerikane dhe iraniane vazhdojnë shkëmbimin e sulmeve, pavarësisht marrëveshjes së ndërmjetësuar nga Pakistani për uljen e tensioneve.
Ndërkohë, Sekretari amerikan i Mbrojtjes, Pete Hegseth, bëri të ditur në Kongres se lufta me Iranin i ka kushtuar deri tani SHBA-së rreth 37.5 miliardë dollarë.
Ai kërkoi miratimin urgjent të 87 miliardë dollarëve shtesë për Pentagonin, ku pjesa më e madhe do të përdoret për operacionet ushtarake në Lindjen e Mesme. Seanca në Kongres u shoqërua me protesta kundër luftës, ndërsa administrata amerikane vijon të kërkojë rritje rekord të buxhetit ushtarak për vitin e ardhshëm.
