Gjykata e Vlorës ka lënë në burg Gerald Bibën, i akuzuar për dhunimin e një protestuesi gjatë protestës në zonën e Zvërnecit. Videoja kur protestuesi dhunohet dhe merret me forcë nga Geraldo Biba dhe një roje tjeter u shpërnda gjerësisht në rrjetet sociale, duke ngjallur reagime të menjëhershme.
Ndërkohë po këtë të hënë, Policia e Shtetit njoftoi se i është hequr licenca dy subjekteve private të sigurisë fizike, Myrto Security 1.3A dhe Major Security.
Nga verifikimet ka rezultuar se subjekti “Myrto Security 1.3A” nuk kishte marrë masat e nevojshme për kontrollin e hyrje-daljeve në objekt dhe nuk administronte listën e personave dhe mjeteve të autorizuara. Për shkak të mospërmbushjes së këtyre kritereve, janë lejuar të hyjnë në brendësi të rrethimit, persona të paidentifikuar dhe të panjohur nga personeli i shërbimit.
Këta persona, gjatë tubimit, kanë ndërhyrë pa patur asnjë atribut ligjor dhe kanë goditur e tërhequr me forcë një shtetas pjesëmarrës në protestë, duke i shkaktuar lëndime trupore. Ndërsa punonjësi i licencuar i subjektit ShPSF “Major Security”, Gerald Biba, së bashku me dy persona të tjerë, duke shpërdoruar detyrën dhe në tejkalim të kompetencave, pasi goditi me grusht një prej protestuesve, e morën me forcë dhe e çuan në brendësi të rrethimit duke i shkaktuar dëmtime trupore.
Në përfundim, Drejtori i Përgjithshëm i Policisë së Shtetit ka vendosur heqjen e licencave për të dy subjektet, në zbatim të ligjit “Për shërbimin privat të sigurisë fizike”.
