Qeveria dhe opozita në Greqi janë përplasur në parlament lidhur me përballimin e situatës se koronavirusit. Sipas kryeministrit Kiriakos Mitsotakis plani i lehtësimit te masave do te rezultojë i suksesshëm dhe se vendi është gati të prese turistet këtë vere.
KYRIAKOS MITSOTAKIS
KRYEMINISTER I GREQISE
Për çështjen e turizmit Greqia ishte vendi i parë, i cili e diskutoi në Këshillin Europian nevojën për të pasur një ndërveprim të unifikuar të Europës së bashkuar për çështjen e transportit ajror, por edhe për mënyrën se si do të funksionoje industria e turizmit këtë verë. Pas presionit tonë të vazhdueshëm shumë shpejt do të kemi njoftime për turizmin dhe cili do të jetë protokolli që do të ndiqet me qellim që turistët të udhëtojnë drejt Greqisë të sigurt.
Nga ana tjetër, kreu i opozitës ka kritikuar ashpër qeverinë për lehtësimin e masave, sipas tij tejet të ngutshme dhe të rrezikshme.
ALEXIS TSIPRAS
KRYETAR I OPOZITES, GREQI
Cila është logjika e hapjes së shkollave të mesme dhe kryesisht shkollave fillore? Sinqerisht e kam të vështirë ta kuptoj pse e morët këtë vendim. Pse po rrezikoni duke hapur shkolla? Mund të jetë për shkak të dëshirës suaj për të korrur lavdinë e fituesit dhe nxitimin për të treguar se jeni rikthyer në normalitet, ndërsa e dini shumë mirë se normaliteti nuk do të ekzistojë për shumë kohë.
Ish-kryeministri i kërkoi kundërshtarit të tij politik të mos bëjë krahasime me numrin e të vdekurve nga koronavirusi si dhe të mos politizojë menaxhimin e kësaj krize në vendet e tjera të Europës, duke sjellë në vëmendje edhe Shqipërinë.
ALEXIS TSIPRAS
KRYETAR I OPOZITES, GREQI
Dhjetë ditë përpara se ne të shpallnim izolimin Italia kishte 130 viktima. Nuk dëshiroj t’i hyj këtij debati makabër, që të krahasojmë vdekjet mes vendeve. Të mos themi për shembull se Spanja ka shumë viktima sepse atë vend e drejton e majta. Atëherë do të duhet të thoshim se Shqipëria dhe Bullgaria janë vendet më të mira në Europë, të cilat kanë numër më të vogël viktimash nëkrahasim me ne. Ky është një krahasim makabër.
Kjo është hera e dytë që kreu i opozitës merr për shembull Shqipërinë për mirëmenaxhimin e krizës se Covid-19.
