Përplasja Trump-Zelensky në Shtëpinë e Bardhë, vjen reagimi nga Rusia

Pas përplasjes së dy Presidentëve Trump-Zelensky, ka ardhur edhe reagimi i parë nga Rusia.

Zëdhënësja e Ministrisë së Jashtme të Rusisë, Maria Zakharova, e ka cilësuar vizitën e presidentit ukrainas Volodymyr Zelensky në Uashington si një dështim të plotë diplomatik të Kievit.

Zakharova ka deklaruar se Zelensky është “i fiksuar” pas zgjatjes së luftës dhe ka përsëritur qëllimet e Moskës, duke theksuar se ato mbeten “çmilitarizimi” i Ukrainës dhe aneksimi i territoreve të pushtuara nga Rusia.

“Me sjelljen e tij jashtëzakonisht të vrazhdë gjatë qëndrimit në Uashington, Zelensky konfirmoi se ai është kërcënimi më i rrezikshëm për komunitetin botëror, si një nxitës i papërgjegjshëm i një lufte të madhe”, u shpreh Zakharova.

Ajo shtoi se sa më shpejt që Kievi dhe disa kryeqytete evropiane ta kuptojnë këtë, aq më afër do të jetë zgjidhja paqësore e krizës ukrainase.

Ndërkohë, presidenti rus Vladimir Putin ende nuk ka bërë ndonjë koment zyrtar mbi takimin e zhvilluar në Zyrën Ovale.

/vizionplus.tv