Reshjet e dendura të shiut kanë shkaktuar vërshime në të gjithë territorin e Kosovës.
Fushë-Kosova, Rahoveci, Klina, Mitrovica, Vushtrria, Skënderaji dhe Gjakova janë komunat më të prekura, ndërsa Malisheva dhe Juniku kanë shpallur gjendjen e emergjencës.
Uji ka depërtuar në shtëpi dhe biznese, ndërsa disa segmente rrugore janë bërë të pakalueshme. Disa familje janë evakuuar për shkak të rrezikut nga përmbytjet dhe energjia elektrike është ndërprerë në zonat e prekura.
Ministria e Arsimit ka njoftuar se fillimi i procesit mësimor shtyhet deri më 12 janar për shkak të kushteve të motit.
Shiu dhe bora kanë vazhduar po ashtu të shkaktojnë kaos në Ballkan: në Serbi, disa komuna perëndimore vendosën masa të jashtëzakonshme për shkak të motit të keq, ndërsa erërat e forta dhe deti i trazuar goditën vijën bregdetare të Adriatikut në Kroaci dhe Mal të Zi.
Ndërkohë, në Bosnjë një grua humbi jetën në mes të stuhisë.
Bora, akulli dhe temperaturat e ulëta kanë sjellë probleme në Evropë këtë javë, me pesë persona të konfirmuar të vdekur të martën në aksidente rrugore në Francë.
Nga ana tjetër, Aeroporti i Schipholit në Amsterdam anuloi rreth 600 fluturime, ndërsa ekipet kanë punuar pa reshtur për të pastruar pistat dhe për të shkrirë akullin për avionët që prisnin të niseshin.
/vizionplus.tv
