Deputetët demokratë kanë folur për mediat pas përfundimit të mbledhjes së Kryesisë. Flamur Noka komentoi debatin që ai pati me ish-deputetin Ervin Salianji gjatë mbledhjes.
Noka tha se dorëheqja e tij apo e dikujt tjetër do të qetësonte vetëm kryeministri Edi Rama dhe shërbëtorët e tij.
“Tani unë po flas këtu për axhendën e demokratëve dhe të opozitarëv , ju po flisni për axhenda jashtë partiake që janë në shërbim të qeverisë. Por sot dorëheqja e vetme që kërkohet nga gjithkush është dorëhqeja e Ramës. Dorëheqja ime apo dikujt tjetër këtu qetëson vetëm një gjë Ramën dhe shërbëtorët e tij”, tha Noka.
Ndërsa Salianji sqaroi qëndrimet e tij.
“Jam i keqardhur që mbledhja e Kryesisë e zhvendosi komplet fokusin nga protesta te diskutimet e brendshme. Kishte mendime të ndryshme, por ajo që di t’ju them është se do ecim përpara. Nuk do ketë ndryshim pa sakrifica, pa reagime dhe pa përplasje”, deklaroi Salianji.
Ai theksoi se do t’u përgjigjet të gjitha akuzave me fakte dhe emra konkretë. “Do vazhdojmë të ecim përpara çdo akuze dhe çdo idiotësie do t’i përgjigjemi me fakte konkrete dhe me emra konkret”, shtoi ish-deputeti demokrat.
Salianji gjithashtu hodhi akuza ndaj drejtuesve të Partisë Demokratike, duke i konsideruar përgjegjës për paqartësitë në vendimmarrje.
“Vendimmarrja e PD-së, e cila ka qenë e paqartë në shumë situata, i bën drejtuesit përgjegjës. Unë po bëj përgjegjës drejtuesit e PD-së për këto paqartësi”, u shpreh ai.
I pyetur lidhur me akuzat se kishte mbledhur firma të deputetëve për kandidaturën e Endri Shabanit për postin e Avokatit të Popullit, Salianji reagoi me ironi, duke i mohuar këto pretendime.
“Edhe luftërat punike unë i kam zhvilluar. Edhe për firmat për Endri Shabanin unë i kam mbledhur, që nuk jam deputet”, tha Salianji me tone ironike, duke lënë të kuptohet se akuzat ndaj tij janë të pavërteta.
