Sekretari i Përgjithshëm i PD, Gazment Bardhi akuzoi kryetarin e SPAK, Arben Kraja se po bën çështë e mundur që kryeministri Edi Rama të mos hetohet për vjedhjen e votave.
Ai reagoi në “Facebook” për vendimin e Prokurorisë së Posaçme për të mos pranuar dosjen “184” e për ta dërguar atë në Dibër. Sipas Bardhit, kjo tregon qartë se SPAK është në shërbim të Edi Ramës.
“Hetimi i dosjeve ku janë përfshirë zyrtarë të lartë, siç është kryeministri dhe disa deputetë të PS është detyrë ekskluzive e SPAK-ut. Prokuroria e Posaçme u ngrit për t’i dhënë fund pandëshkueshmrisë së politikanëve dhe zyrtarëve të lartë, por akti i sotëm i shërbëtorit të Edi Ramës në krye të SPAK-ut godet çdo pritshmëri se Arben Kraja mund të sillej ndryshe nga Donika Prela, përsa kohë padroni i tyre është në krye të qeverisë.”
Gazment Bardhi i kërkoi sqarime Arben Krajës për vendimin e marrë për të mos hetuar krimin zgjedhor ku janë të implikuar politikanët.
“Duke ridërguar dosjen 184 në Dibër, drejtuesi i SPAK, praktikisht, ka varrosur hetimin e një krimi të dokumentuar zgjedhor, i cili është kusht i Bundestagut gjerman për hapjen e negociatave të anëtarësimit të Shqipërisë në Bashkimin Europian. Arben Kraja ka detyrim të japë sot sqarime publike pse i mohoi SPAK-ut mundësinë e hetimit të Edi Ramës dhe shpurës së tij për vjedhjen e zgjedhjeve në Dibër.”
