Partia Demokratike nënvizon edhe njëherë se paketa “Anti-KÇK” është vetëm një mjet që i shërben pushtetit të kryeministrit Edi Rama dhe jo interesit publik.
Në një deklaratë për mediat, ish-deputeti Flamur Noka shkruan se ky ligj nuk zbatohet për miqtë dhe bashkëpunëtorët trafikantë droge të qeverisë, ndërsa sjell rastin e Ermal Hoxhës. Sipas tij, ky i fundit, i dënuar për ngitjen e laboratorit të parë të kokainës në Shqipëri, nuk verifikohet nga policët e OFL-së.
“Edi Rama është i pafuqishëm për të luftuar krimin e organizuar, sepse ai është vetë krimi i organizuar. Me pasuritë e trafikantëve të drogës, Edi Rama ka lidhur pushtetin dhe pasurimin e paligjshëm të tij dhe të familjes së tij. Në vend të shoë-t qesharak dhe turizmit policor nga një qytet në tjetrin, e ashtuquajtura Forca e Ligjit mund të bënte shumë punë në Tiranë me trafikantët e drogës në miqësi dhe në biznes me vëllanë e kryeministrit. Pasuritë e Ermal Hoxhës, bashkëpunëtorit të Olsi Ramës për ngritjen e laboratorit të kokainës në Xibrakë, nuk duhet të mbeten të paprekshme”.
Ndër të tjera, Noka theksoi se Ermal Hoxha mbrohet nga vëllai i kreut të qeverisë, Olsi Rama.
“Fatkeqësisht, rastet si ky i Ermal Hoxhës, Saimir Tahirit apo Taulant Ballës me mikun e tij trafikant droge, që merr tendera publikë tregojnë sesa thellë e ka kriminalizuar Edi Rama politikën dhe vendimmarrjen. Fatmirësisht, shqiptarët janë vetëdijësuar se ligji në duart e Edi Ramës është vetëm një mjet që i shërben pushtetit të tij dhe jo interesit publik. Në çdo sondazh online, ku qytetarët votojnë të lirë, tregon mosbesimin e thellë të shqiptarëve tek kjo qeveri dhe tek ky kryeministër. Shqiptarët e dinë se nuk ka asnjë shans që Edi Rama të luftojë krimin e organizuar, pasi ai është produkti politik i parave të pista të krimit të organizuar.”
Ish-deputeti demokrat akuzon kryeministrin se gjatë gjithë karrierës se tij politike, ka siguruar vota dhe para prej krimit të organizuar, duke u dhënë trafikantëve të drogës leje ndërtimi, koncesione, tendera dhe pasuri publike.
“Për të luftuar krimin e organizuar, Shqipëria nuk ka nevojë për ligje të reja propagandistike, që nuk zbatohen kurrë për miqtë, familjarët dhe klientët e kryeministrit. Shqipëria ka nevojë për një qeveri dhe një kryeministër që nuk është peng i krimit të organizuar.”
