Partia Demokratike akuzoi Policinë e Shtetit se Operacioni “Forca e Ligjit” është thjesht shou sepse nuk godet të afërmit e qeveritarëve. Ish-deputeti Ervin Salianji, në një deklaratë për mediat, tha se policia ka marrë urdhër të mos prekë makinën e blinduar me të cilën lëviz Olsi Rama, vëllai i kryeministrit.
“Edi Rama dhe ushtari i tij në Minsitrinë e Brendshme, Sandër Lleshaj kanë standard të dyfishtë në zbatimin e ligjit. Ata urdhërojnë shfaqje propagandistike me bllokimin e automjeteve të blinduara, të pajisur me leje të lëshuara nga vetë policia, por nuk bllokojnë makinën e blinduar të Olsi Ramës. Partia Demokratike disponon të dhëna të plota se Policia e Shtetit është e udhëzuar të mos ndalojë në asnjë rrethanë automjetin e blinduar Linkoln me targën TR 0370 T.”
Demokrati e quajti spektakël të gjithë aksionin e policisë kundër KÇK. Sipas tij, Rama nuk e lufton dot krimin sepse ka vetë lidhje me të.
“Spektakli me makinat e blinduara është një flluskë e propagandës bajate të Edi Ramës. Edhe gjoja spektakli me sekuestrimin e pasurive të krimit të organizuar po rezulton një dështim, sepse një kryeministër që ka përdorur paratë e krimit për të ardhur në pushtet dhe për ta mbajtur pushtetin nuk mund të luftojë krimin.”
