Dy kërkesat kryesore të kandidatëve që garojnë përballë Lulzim Bashës për postin e kryetari të PD nuk do të plotësohen. Kreu i komisionit zgjedhor në PD Jemin Gjana ka hedhur poshtë kërkesën e parë që të gjithë kandidatët të kenë listën e 75.067 anëtarëve të PD që kanë të drejte vote në 13 qershor.
Gjana është mbështetur tek ligji për mbrojtjen e të dhënave personale për të argumentuar pse kandidatët nuk mund të kenë listën e votuesve.
JEMIN GJANA
KRYETAR I KOMISIONIT ZGJEDHOR, PD
“Bazuar mbi këtë ligj, ne jemi një parti politike që jemi për ta patur shtetin ligjor, për ta mbrojtur shtetin ligjor, këto të dhëna nuk mund të disponohen përveçse nga ata që janë të autorizuar të çekojnë tek sistemi.
Në këtë sistem çekon vetëm Sekretari Organizativ i partisë dhe një punonjës i caktuar nga partia për këtë punë dhe për të qenë transparent me të gjithë kandidatët, dhe katër ekspertë IT, që ata do të adresojnë tek sistemi.”
Por PD këtë herë nuk ka respektuar një standard që ka ekzistuar në garën për kryetarin e PD në vitin 2013 dhe 2017; kur kandidatët kanë pasur një anëtar në të gjitha komisionet për të mbikëqyrur procesin. Këtë herë garuesve u është dhënë e drejta vetëm për të pasur vëzhgues.
“Është e vërtetë që në 2017 ka qenë kështu, por kanë qenë dy kandidatë. Sot jemi me katër kandidatë, pra jemi me katër palë sy vëzhgimi. Më ndryshe do të detyroheshim që nga katër, numri i atyre që emërohen nga struktura të ishte një më shumë, të ishin 5 dhe do bënim disa komisione me 9 anëtarë të pamenaxhueshëm, kështu që dakordësia ka qenë që të mbetemi në nivelin e 3 anëtarëve gjithsej në Komision dhe katër anëtarëve përfaqësues, vëzhgues.”
Këto janë vetëm dy prej elementëve të cilët janë nxjerrë në pah nga kandidatët për postin e kryetarit të PD të cilët në jo pak raste kanë deklaruar se gara është e pabarabartë pasi garojnë përballë Lulzim Bashës që është drejtuesi i PD.
