24 janari pritet të jetë data kur PD do të zhvillojë protestën kombëtare kundër qeverisë së drejtuar nga Kryeministri Edi Rama. Edhe pse ende nuk ka një njoftim zyrtar nga PD mësohet se nga diskutimet deri tani, e shtuna e 24 janarit është data më e mundshme për nisjen e protestave.
Vetë kryetari i PD Sali Berisha deklaroi për gazetarët se data e protestës do të vendoset në takimin e së premtes me të gjitha forcat opozitare.
“Asnjë datë nuk është përcaktuar. Ka një datë që ditën e premte do të mblidhet një tryezë shumë e gjerë e opozitës, shoqërisë civile dhe faktorëve të rëndësishëm shoqëror, ku do të përcaktohet edhe data, edhe qëndrimet në vazhdim ndaj Ramaduros dhe qëndrimet ndaj tij. Pra ne shkojmë në tryezë të hapur, për të dëgjuar, diskutuar me të pranishmit dhe vendosur së bashku mbi qëndrimet, protestat që do të ndërmarrim në vazhdim,” deklaroi kryetari I PD Berisha.
Deri tani opozita ka organizuar një protestë kombëtare në 22 dhjetor, dhe çdo të hënë zhvillon foltoren para godinës së kryeministrisë për të kërkuar largimin e Kryeministrit Edi Rama.
Kryetari I PD, Sali Berisha ka deklaruar se protestat e opozitës nuk do të ndalen deri në largimin e Edi Ramës dhe krijimin e një qeverie teknike që do të çojë vendin në zgjedhje të parakohshme.
/vizionplus.tv
