Partia Demokratike e cilëson antikushtetues aktin normativ “Anti-KÇK” të miratuar nga qeveria.
Në një deklaratë për mediat, selia blu thekson se ky ligj ka për qëllim të zëvendësojë SPAK-un me Ardi Veliun, me synimin për ta transformuar Shqipërinë në një shtet policor.
“Akti normativ i qeverisë për krimin e organizuar është antikushtetues, nuk forcon luftën ndaj tij, ul standardin e goditjes ndaj krimit të organizuar dhe dublon kompetencat e SPAK-ut dhe BKH-së. Nëse do të zbatohej, ligji antimafia në fuqi ka mekanizma më të fortë dhe më efikasë për luftën ndaj krimit të organizuar, përmes goditjes së pasurisë së tij, por akti normativ synon të zëvendësojë SPAK-un me Ardi Veliun.”
Sipas demokratëve, duke i dhënë policisë kompetencat që ia rrëzoi Gjykata Kushtetuese 4 vjet më parë, ligji i ri krijon bazën për krjimin e modelit të shtetit policor.
“Nuk ka asnjë shans që Edi Rama të luftojë krimin e organizuar, pasi ai është produkti politik i parave të pista të krimit të organizuar. Gjatë gjithë karrierës se tij politike, Edi Rama ka siguruar vota dhe para prej krimit të organizuar, duke u dhënë trafikantëve të drogës leje ndërtimi, koncesione, tendera dhe pasuri publike.”
Ndër të tjera, në deklaratë nënvizohet se Shqipëria nuk ka nevojë për ligje të reja për të luftuar krimin e organizuar, po për një qeveri dhe kryeministër që nuk është peng i saj.
“Partia Demokratike është e vetmja forcë e madhe politike që mund ta sigurojë këtë. Ne kemi vullnetin për të goditur krimin dhe për të luftuar korrupsionin, që po zbras çdo ditë Shqipërinë”, mbyll deklaratën PD.
