Partia Demokratike ka akuzuar kryeministrin Edi Rama se po përdor policinë e shtetit për kërcënim dhe shantazh ndaj studentëve.
Në një deklaratë për mediat, deputetja Albana Vokshi duke u ndalur tek deklarata e policisë dhe ngujimi I studentëve në fakultete, paralajmëroi kryeministrin dhe policinë se do të paguajnë për kërcëniemt e tyre ndaj studentëve.
Sipas Vokshit, një fenomen I tillë ndodh vetëm në regjimet diktatoriale pasi Ligji i Arsimit të Lartë e ndalon futjen e policisë në universitete.
“Ligji për Arsimin e Lartë e ndalon rreptësisht hyrjen e policisë në fakultete, përveçse kur prania e tyre kërkohet nga drejtuesit në rastet e krimeve flagrante. Ligji siguron “ndëshkimin për “cënimin e paprekshmërisë së institucioneve të arsimit të lartë”. Deri tani, organet e drejtësisë nuk kanë ndërmarrë asnjë veprim për të ndëshkuar shkeljen e hapur të paprekshmërisë territoriale të universiteteve nga narkopolicia politike e Edi Ramës. Gjithashtu, Partia Demokratike dënon deklaratën kërcënuese të policisë, të shkruar nga Edi Rama, dhe paralajmëron kryeministrin dhe veglat e tij në polici se do të paguajnë për kërcënimet e tyre për arrestimin apo ndjekjen penale të studentëve. Ne nuk do të harrojmë askënd që shkel ligjin për llogaritë politike kriminale të Edi Ramës.”
Vokshi gjatë deklaratës së saj hodhi akuza dhe për disa drejtues të lartë të universiteteve që sipas saj, janë vënë në shërbim të qeverisë.
“Duke përgëzuar të gjithë pedagogët që janë solidarizuar me protestën për një kauzë të drejtë të studentëve, vërejmë me keqardhje që në disa fakultete, drejtues të lartë dhe pedagogë janë vënë në shërbim të qeverisë, duke ushtruar presione nga më të ndryshmet mbi studentët: duke i kërcënuar me mungesa, me ngelje në provime apo djegie diplome. Partia Demokratike i dënon me forcë këto presione dhe i fton pedagogët të mos i shërbejnë një pushteti kriminal kundër interesave të studentëve.”
Në mbyllje të deklaratës, Vokshi tha se PD e mbështet protestën e studentëve dhe se do ta anullojë ligjin e arsimit të lartë.
