Paratë e një kuizi televiziv i ndryshuan jetën, sot trajneri shkruan historinë në Champions League

Për herë të parë në historinë e tij, Sabah FC ka arritur të fitojë një ndeshje në fazën kryesore të UEFA Champions League kundër Slavia Pragës me rezultatin 2-0, ndërsa pas këtij suksesi qëndron edhe puna e trajnerit lituanez, Valdas Dambrauskas, rrugëtimi i të cilit është sa i veçantë, aq edhe frymëzues.

Historia e tij nuk nisi në pankinën e një klubi të madh europian. Në vitin 2000, Dambrauskas mori pjesë në emisionin televiziv “Kush do të bëhet milioner”, ku fitoi para që do t’i shërbenin për të ndjekur kurse trajnimi futbolli në Angli.

Shtatë vite më vonë, në vitin 2007, ai nisi karrierën si trajner te Kingsbury London Tigers, një ekip që militonte në nivelin e nëntë të futbollit anglez. Kjo ishte puna e tij e parë në pankinë, por ambicia dhe pasioni për futbollin do ta çonin shumë më larg.

Pas eksperiencës në Angli, Dambrauskas drejtoi disa skuadra, kryesisht në rajonin e Baltikut, duke ndërtuar gradualisht karrierën e tij si trajner.

Sot, ai është pjesë e një kapitulli historik për Sabah FC. Nën drejtimin e tij, skuadra ka arritur një sukses të madh në kompeticionin më prestigjioz europian për klube, duke regjistruar fitoren e parë historike në fazën kryesore të Champions League.

Nga një garë televizive dhe një ekip modest në Angli, deri te skena e madhe e futbollit europian, rrugëtimi i Valdas Dambrauskas është një shembull se si këmbëngulja, përkushtimi dhe besimi te ëndrra mund të të çojnë drejt majave.